Татарстанда мәчеләрнең сирәк төрләрен өйрәнү үзәге белгечләре барсның чиста генын чыгарачак

Татарстанда булдырыла торган «Ак Барс» мәчеләрнең сирәк төрләрен өйрәнү үзәгендә фәнни эшләнмәләрне республика галимнәре генә түгел, Россия Фәннәр академиясенең А.Н.Северцов исемендәге Экология һәм эволюция проблемалары институты белгечләре дә алып барачак. Эшләнелә торган проект турында ТР Экология һәм табигый ресурслар министры Александр Шадриков сөйләде.
«Бу дөнья дәрәҗәсендәге фәнни-тикшеренү үзәге булачак. Бездә КФУда белгечләр бик көчле. Безгә академиклар килгәч, алар сокландылар һәм бүгенге көндә безнең университетта булган базага гаҗәпләнделәр. Бүгенге көндә КФУда әлеге геномнар банкы — Россия Федерациясендә бердәнбер. Җиһазланыш дәрәҗәсе дә югары дәрәҗәдә», — диде ул.
Спикер билгеләп үткәнчә, үзәк белгечләре «чиста геном чыгарачак, бу бик мөһим». Эшнең фәнни өлешен Россия галим-териологы Вячеслав Рожнов җитәкчелегендә РФА А.Н.Северцов исемендәге Экология һәм эволюция проблемалары институты хезмәткәрләре җитәкләячәк.
«Барсларны кыргый мохиттән алып кайтачакбыз. Тигез булмаган рельеф булдырабыз, һәр төр өчен аерым территория булачак: мануллар өчен — кечкенә, барслар өчен — зур. Бу — мәчеләрнең уникаль төре. Эсселек белән салкынны кайсысы ничек кичерүен өйрәнәчәкбез, бу җитди эш булачак», — дип билгеләп үтте Шадриков.
ТР Экология министрлыгының матбугат хезмәтендә аңлатуларынча, эшләнмәләргә «Россия Фәннәр академиясенең Казан фәнни үзәге» Федераль тикшеренү үзәге, Идел-Кама дәүләт табигать биосфера тыюлыгы, биоресурслар буенча ТР Дәүләт комитеты белгечләре дә җәлеп ителәчәк. Проектны оештыру һәм административ озата баруны ТР Экология министрлыгы хезмәткәрләре алып барачак.