Татарстаннан 3 мең егет яз көне армиягә алыначак

Бүгеннән башлап Татарстанда һәм гомумән Россиядә язгы чакырылыш кампаниясе башланды. Республикадан барлыгы 3 мең егет хәрби хезмәткә алыначак. Бу хакта ТР хәрби комиссары Сергей Погодин хәбәр итә. 

Җитәкче әйтүенчә, РФ Президенты карары нигезендә быелның апрель-июль айларында Россиядә хәрби хезмәткә 17 яшьтән 28 яшькәчә булган 134 меңнән артык кеше чакырылачак. Хәрби хезмәткә чакыру 1 апрельдән 15 июльгә кадәр дәвам итәчәк. 

Татарстаннан чакырылучы булачак солдатларның 45 проценты хезмәткә Коры җир гаскәрләренә китәчәк.

ТРның җыелу пунктыннан хәрби хезмәткә китүчеләрне беренче җибәрү апрель ахырында булырга тиеш.