Алабугада «Этночыршы» чарасы узды

Бүген, Иллюзион кинотеатрының «зәңгәр залында» «Этночыршы» тантанасы узды. Әлеге чараны Татарстан халыклары ассамблеясенең Алабуга районындагы вәкиллеге һәм 5нче санлы территориаль-иҗтимагый үзидарә оештырдылар.
Шәһәрдә этник чыршы инде алтынчы ел үткәрелә. Катнашучылар милли киемнәрдә иде, төрле телләрдә котлаулар, шигырьләр һәм җырлар яңгырады.



— Бәйрәмгә төрле милләт балалары, гаиләләре килгән. Бу без барыбыз да тынычлыкта һәм татулыкта яшибез икәнне күрсәтә, ул бик мөһим. Татарстанда 173 милләт вәкиле яши. Ә бүген сез төрле телләрдә шигырьләр, җырлар ишеттегез. Үз мәдәниятеңне сакларга, аны яратырга, шулай ук безнең белән бергә яшәүче халыкларның мәдәниятен хөрмәт итәргә кирәк. Шулай ук ата-аналарга үз халкының мәдәниятен саклап калуда тырышлылары өчен рәхмәт әйтәсем килә. Бәйрәм белән сезне, — дип катнашучыларны котлады Татарстан халыклары ассамблеясенең Алабуга районындагы вәкиллеге директоры Зөләйха Эмирбәкова һәм «Этноуенчык» бәйгесендә җиңүчеләргә сертификатлар, диплом һәм истәлекле бүләкләр тапшырды.