Татарстанлыларга яшен вакытында саклык чаралары турында искәрттеләр

Синоптиклар фаразлавынча, иртәгә, 4 майда, көндез һәм кич республика территориясендә көчле яңгыр, яшен, урыны белән боз яварга мөмкин. Шул сәбәпле, Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә һава торышы начарланганда иминлек чаралары турында искәртә, дип яза Татар-информ.

Көчле җил булганда бина эчендә калырга, тәрәзәләрне һәм ишекләрне ябарга тәкъдим ителә. Урамда реклама щитлары, элмә такталар, юл билгеләре һәм электр тапшыру линияләре янында тормаска кирәк. Зур агачлар янына якын килмәгез, алар янында машинаны да калдырмагыз.

Әгәр яшен вакытында велосипедта яки мотоциклда хәрәкәт итсәгез, иң яхшысы хәрәкәтне туктатырга транспорт чарасыннан 30 метр ераклыкта һава торышы яхшырганны көтеп торырга кирәк. Әгәр яшен вакытында руль артында булсагыз, шулай ук туктарга, тәрәзәне ябарга һәм көтеп торырга кирәк.

Яшен вакытында ачык урында булсагыз, мөмкин булганча түбән урында җиргә ятарга, сулыклардан ерактарак торырга кирәк. Ерак сәфәрләргә чыгудан тыелып торырга киңәш ителә.