Алабугада иң яхшы механизаторларны бүләкләделәр

Кырга барып, район башлыгы урынбасары Олег Колпаков һәм районның Авыл хуҗалыгы һәм азык-төлек идарәсе башлыгы Александр Косов механизаторларга хезмәтләре өчен рәхмәт белдерде һәм аларга, рәхмәт хатлары белән бергә, акчалата премия тапшырды. 

− Сезне, яхшылардан яхшыларны, котларга килүе бик рәхәт. Эшегез гади түгел, урак өстендә техникага, игеннәргә дә аеруча игътибар таләп ителә. Район башлыгы Рөстәм Нуриев исеменнән сезгә сәламәтлек, рух күтәренкелеге, хезмәттә уңышлар, күңелегезне төшермичә, һәрвакыт хәрбиләрчә эш урыныгызда, комбайннарда булуыгызны телим, − диде Олег Колпаков.

Көн саен район кырларына 40 комбайн чыга. Аларны тәҗрибәле белгечләр дә, яшьләр дә йөртә. "Башак«тагы иң тәҗрибәле механизаторларның берсе − Николай Филимонов, ул бөртеклеләрне ура торган комбайннар һәм үзйөрешле чапкыч механизаторлары арасындагы муниципаль конкурста 3нче урын алган кеше. Ул «Нива» комбайнында эшли һәм 145 тонна ашлык суктырган инде. 

− Башкалар кебек үк эшлим. Ни өчен күрсәткечләр яхшы? Тәҗрибә, күрәсең, − ди ул.

«Башак» авыл хуҗалыгы кооперативында Роман Щекочихин дүртенче елын эшли. Җәен ул комбайнда, кышын — башка техникада. 

− Комбайн яңа, тоткарлыксыз, быел уңыш та яхшы. Көн буе авыр түгел, нәтиҗә яхшы булганда, тагын да күбрәк эшлисе килә, − ди Роман.

Әйтергә кирәк, иң яхшы эшләүчеләрне атна саен ачыклаячаклар. 

Гомумән алганда, 22 августка районда бөртекле һәм бөртекле-кузаклы культуралар 10 мең гектарда суктырылган, бу барлык мәйданның 52 процентын тәшкил итә. Уҗым культуралары һәм солы тулысынча җыеп алынган, сабан бодаен, 500 гектар арпаны, 50 гектар борчакны җыясы калган. Уртача уңыш — бер гектардан 33,5 центнер. Иң яхшы нәтиҗә: арпа — гектарыннан 35,4 центнер, сабан бодае — 35 центнер, солы — 33,8 центнер.

Урып-җыюда «Яшь көч агрофирмасы» ҖЧҖ (85 процент), «Якты үзән» ҖЧҖ (75 процент), «Яңа Юраш» агрофирмасы" ЯАҖ (62 процент), «Әхмәтҗанов КФХ» (61 процент) алда бара. Иң яхшы уңыш алучылар: «Нократ таңнары» ҖЧҖ — бер гектардан 38 центнер, «Мир» ҖЧҖ − 37,5 центнер, «Яшь көч» агрофирмасы" ҖЧҖ − 36,6 центнер.

Моннан тыш, «Әхмәтҗанов Ф.Г.» крестьян-фермер хуҗалыгында арпа уңышы гектарыннан 49,5 центнер, сабан бодае "Нократ таңнары"нда — бер гектардан 48 центнердан да артык, "Яшь көч«тә — 40 центнер, «Якты үзән» җәмгыятендә − 40, 1 центнерга җиткән.