Алабуга 2025 ел фаразларында: тотрыклы динамика, яңа эш урыннары

Җитәкче хәбәр иткәнчә, районның сәнәгать компанияләре уңай нәтиҗәләр күрсәтә. Икътисади күрсәткечләрне формалаштыруда «Алабуга» махсус икътисади зонасы мөһим роль уйный. Бүген биредә 68 резидент теркәлгән, аларның 38е җитештерү эшчәнлеге алып бара. 18 меңнән артык эш урыны булдырылган.

МИЗ үсә

«Соллерс» компаниясе масштаблы локальләштерү программасын гамәлгә ашыра — биредә «Евро-6» экологик стандартына туры килә торган 2 һәм 2,7 литр күләмле дизель двигательләрен җыю башланды. Шулай ук двигательләрнең төп детальләрен механик эшкәртү процессы эшли башлады. Sollers автомобильләре базарының өлеше бүген 11 процент тәшкил итә.

Моннан тыш, Татарстанда Сәнәгатьне үстерү фонды ярдәмендә Sollers автомобильләре өчен штампланган детальләр җитештерү оештырыла. Алар «СМЦ Алабуга» һәм "Джошкуноз Алабуга«да җитештереләчәк.

«Вагнермайер Русланд» компаниясе быелдан башлап елына 2 мең берәмлектән артык куәтле тулы цикллы магистраль ярымприцеплар җитештерә башлады. 750 миллион сум инвестицияләнгән, 135 эш урыны булдырылган.

«Интэко Тюбинг» компаниясе елына 1070 мең метр күләмендә сыгылмалы насос-компрессор торбалар җитештерә башлады һәм рәсми ачылуга әзер. Инвестицияләр 1,2 миллиард сумга җитте, 50 эш урыны булдырылды.

Гигиена эшләнмәләре җитештерүче «Драйлок Текнолоджиз» үз куәтләрен киңәйтә һәм логистик процессларны автоматлаштыруны гамәлгә кертә. Инвестицияләр 1 миллиард сумнан артык тәшкил итәчәк, 50 яңа эш урыны булдырылачак.

«Скандипак Алабуга» компаниясе елына 130 миллион данә күләмендә кәгазь җепселләрдән йомырка өчен биологик таркала торган упаковка җитештерү буенча икенче линияне эшләтеп җибәрде. Инвестицияләр күләме — 381,6 миллион сум.

«Август» предприятиесе ашлык тутыру өчен махсус җиңсәләр җитештерү буенча икенче проект — «Август-Полимер» төзелешен төгәлләде. Җитештерү куәте елына 5 мең тонна продукциягә җитәчәк. Проектка инвестицияләр күләме 1,6 миллиард сум тәшкил итте, 27 эш урыны булдырылды, аны 50гә кадәр арттырырга ниятлиләр.

Яңа резидентлар

«Алабуга» махсус икътисади зонасында резидентлар саны арта бару — аның югары җәлеп итүчәнлегенең бер дәлиле булып тора. Быел 6 яңа инвестор җәлеп ителгән.

Җирле предприятиеләр

Районның барлык продукциясенең 20 проценттан артыгын җитештерүче төп компанияләрнең берсе — «Эссен Продакшн АГ» АҖ предприятиесе. 2024 елның 9 ае нәтиҗәләре буенча компания керемне 12 процентка арттырган, керем күләме 30 миллиард сумнан артып киткән. Предприятиенең экспорт өлеше 13 процентка арткан.

Икътисади күрсәткечләрне формалаштыруга нефть сәнәгате предприятиеләре зур өлеш кертә. Бу елның 9 аенда «Прикамнефть» идарәсе 1,5 миллион тонна нефть чыгарган. Шул ук вакытта компания инновацияләргә, нефть төбәгенең экологик иминлеген тәэмин итүгә һәм табигатьне саклауга юнәлдерелгән проектларга инвестицияләр кертә. Компаниянең тагын бер вәкиле — «Татнефть — Пресскомпозит» — гомуми бәясе 6 миллиард сум булган инвестиция проектларын гамәлгә ашыра.

«ТИС» компаниясе «КамАЗ», «АвтоВАЗ» һәм «Соллерс Алабуга» машиналар төзү комплекслары өчен автомобиль утыргычлары, электр һәм механик вентиляция люклары җитештерә.

Кече бизнес

Районда эре предприятиеләр белән беррәттән кече һәм урта бизнес та үсә. Хәзерге вакытта 3 меңнән артык кече һәм урта эшмәкәрлек субъекты теркәлгән, аларда 16,8 мең кеше эшли.

Сәүдә
Кулланучылар базарында ваклап сату әйләнеше бу елның 6 аенда 8,8 миллиард сум тәшкил иткән, 2023 елның шушы чоры белән чагыштырганда 3,6 процентка артыграк. Күрсәткечләр электрон сәүдәнең, продукцияне кулланучыга җиткерү хезмәтенең активлашуы нәтиҗәсендә арта.

Шул ук вакытта районның сәүдә мәйданнары да арта. Барлыгы 2 ел эчендә шәһәрдә 14 сәүдә объекты файдалануга тапшырылган.

Авыл хуҗалыгы

Район икътисадын үстерүдә авыл хуҗалыгы предприятиеләре зур роль уйный. Быелгы сезон гадиләрдән булмады, әмма районның товар җитештерүчеләре эшчәнлеге уңай нәтиҗәләргә иреште.

«МИР», «Аммоний Агро», «Светлая долина» һәм башка эре авыл хуҗалыгы предприятиеләре эшчәнлеге нәтиҗәсендә район сөт җитештерү буенча күрсәткечне 15 процентка, терлек җитештерү буенча күрсәткечне 10 процентка арттыра алды.

Һава шартлары аркасында ашлык уңышы 3 процентка кимегән, ә яшелчә җитештерү, киресенчә, 17 процентка арткан. Бәрәңге уңышы күләме сизелерлек артып, үсеш 35 процент тәшкил итте.

Төзелеш

2024 елның 9 аенда файдалануга тапшырылган торак күләме 58,8 мең квадрат метр тәшкил итте, еллык план — 60 мең квадрат метр. Ел йомгаклары буенча күрсәткечне 70 мең квадрат метрга җиткерү планлаштырыла.

«Торак һәм шәһәр мохите» илкүләм проектын гамәлгә ашыру кысаларында Танайка микрорайонында 60 фатирлы ике йорт, Сөембикә урамында «Кама-Сервис» төзүчесеннән күп фатирлы ике йорт, Мәрҗани — Хирург Нечаев урамнарында 18 катлы йорт төзелә.

«ДОМКОР» компаниясе күпфатирлы йорт төзүне дәвам итә. «Жемчужина» торак комплексы проекты гамәлгә ашырыла.

Фаразлар куанычлы

Нәтиҗә ясап, Илфат Хәбибуллин районның социаль-икътисади үсешендә тотрыклы динамика күзәтелүен билгеләп үтте. Предприятиеләр үсә, технологик процессны яхшыртуга акча кертүне дәвам итә. Ә яңа инвесторлар барлыкка килү икътисадны үстерүгә һәм өстәмә эш урыннары булдыруга ярдәм итә.