Алабуга дәүләт музей-тыюлыгы Төркиядә экспозицияләр оештырды

Алабуга дәүләт музей-тыюлыгының генераль директоры Гөлзада Руденко җитәкчелегендәге иҗат төркеме Төркиядә татар халкының мәдәниятенә багышланган экспозицияләрне яңарту өстендә эшне төгәлләде. 

Бу күргәзмә 2012 һәм 2013 елларда ук музей-тыюлык тарафыннан оештырылды, шуңа күрә экспозиция алдыннан музей хезмәткәрләре идея, концептуаль һәм сәнгать чишелешләрен, аларга яңа мәгълүмати технологияләрне дә кертеп, яңадан карап чыктылар.

Беренче экспозиция Истанбулның «Топкапы» шәһәр паркында төрки телле халыклар комплексы составында, икенчесе — Искешәһәрдә урнашкан. Аларда татарлар тарихы, татар диаспорасының Төркиядә һәм Татарстан территориясендә заманча татар этносының уртак мәдәни һәм тарихи нокталары чагылдырылган. Тәкъдим ителгән экспонатлар арасында — Татарстан Республикасы сәнәгать предприятиеләрендә чыгарыла торган техника модельләре һәм реклама продукциясе, декоратив-гамәли сәнгать эшләнмәләре, савыт-саба, кием-салым, аяк киеме, көнкүреш һәм интерьер әйберләре, йорт җиһазлары, бизәнү әйберләре һәм башкалар. Килүчеләр татар мәдәнияте белән генә танышып калмыйча, Татарстан тормышының барлык өлкәләре турында беләчәк.

Истанбулдагы Музей «Тарих» һәм «Хәзерге заман» бүлекләреннән һәм «Татар ишегалды» верандасындагы урам экспозициясеннән тора. Биредә килүчеләр Татарстан — Идел буе Болгары, Казан ханлыгы, Россия дәүләте составында крайның үсеше турында беләчәкләр. Татарстанның хәзерге тормышы турындагы бүлектә мөһим җитештерү брендлары, авыл хуҗалыгы, мәгариф, спорт объектлары һәм вакыйгалар, мәдәният учреждениеләре һәм башкалар турында мәгълүмат бирелгән.

Искешәһәрдә оештырылган экспозиция татар халкының уникальлеген, үзенчәлеген, тарихи-мәдәни мирасын саклап калуны чагылдыра. Биредә Идел буе татарларын күченү һәм әлеге этник төркемнең алга таба үсеше тарихы тәкъдим ителгән. Бу хакта «Мөхаҗир татарлар һәм кунакчыллык традицияләре» һәм «Хәзерге заман һәм мирас» дип аталучы ике бүлек сөйли.

Искешәһәрдә беренче кунаклар Төркиядәге татар диаспорасы вәкилләре булды. Алар Татарстан Республикасы Президенты Рөстәм Миңнехановка һәм Татарстан Республикасы мәдәният министры Ирада Әюповага рәхмәт сүзләрен җиткерде, Алабуга дәүләт музей-тыюлыгы эшен югары бәяләде.