Алабуга йөзүчеләре XXX Россия Кубогында призлы урыннар яулады

«Мастерс» категориясендә йөзү буенча XXX Россия Кубогында шәһәребез исеменнән чыгыш ясаган җыелма команда 8 спортчыдан торды. Мондый дәрәҗәле ярышларда бөтен илнең 82 клубыннан 1200дән артык йөзүче катнашты.

— Бу рекорд, моның кадәр катнашучылар булганы юк иде әле, — дип билгели оештыручылар.

XXX Россия Кубогы ноябрь уртасында Казанда узды һәм дүрт көн дәвам итте. Оештыручылар тарафыннан турыдан-туры трансляция оештырылып, «Касатка» йөзү буенча ТР ветераннар җыелма командасы җанатарлары барысын да туры эфирда күзәтә алды.

— Бик мавыктыргыч күренеш, — дип тәэсирләре белән уртаклаша алар. 
Ярышларның дүрт көне нәтиҗәләре буенча алабугалылар түбәндәге нәтиҗәләргә иреште.

Михаил Романовның шәхси копилкасы (50-54 яшь категориясе) берьюлы биш бүләк белән тулыланды: 200 метр араны аркада йөзү дистанциясендә беренче урын; өч икенче урын (100 метр дистанциядә, 200 метр дистанциядә һәм команда эстафетасында); 100 метрга йөзүдә өченче урын.
Андрей Гудков үз яшь категориясендә (50-54 яшь) җиңүче булды, ул 100 метрлык дистанциядә иң яхшы нәтиҗә күрсәтте.

Галина Благодатских (70-74 яшь категориясе) 50 метрлык дистанциядә — көмеш, 200 метрлык дистанциядә бронза медальләр яулауга иреште.
Наталья Немтырева (50-54 яшь категориясе) 200 метр араны аркада йөзүдә өченче урынны алды.

Моннан тыш, Алабуга йөзүчеләре 4/50 эстафетасында да көмеш призерлар булып, мактау пьедесталына күтәрелде. Республика җыелма командасы составына безнең спортчылардан Андрей Гудков һәм Михаил Романов керделәр.

Белешмә өчен: 2024 елның 13 гыйнварында Алабугада «Мастерс» 25+ һәм «Юниор» 12+ категорияләрендә йөзү буенча ачык республика беренчелеге узачак. Ярышларны оештыручылар катнашучылар һәм җанатарларны «Чемпион» физкультура-сәламәтләндерү комплексына чакыра.