Алабуга Мәдәният сараен капиталь үзгәрешләр көтә

2025 елда шәһәр Мәдәният сараенда капиталь төзекләндерү эшләре үткәреләчәк. Бу вакыт эчендә хәл ителергә тиешле бурычлар исемлеге бик зур: бинада су белән тәэмин итү, канализация, вентиляция, җылыту системаларын алыштырырга, янгынга каршы һәм сак сигнализациясе урнаштырырга тиешләр. Шулай ук яңа җиһазлар, заманча яктылык һәм тавыш яздыру җайланмалары кую планлаштырыла.

— Шәһәр мәдәният сараенда беренче эшләр гыйнвар уртасында ук башланачак, — дип хәбәр итте төзелеш буенча Алабуга муниципаль районы башкарма комитеты җитәкчесе урынбасары Ринат Шәйхлисламов. — Әлегә эчке эшләр башкарылачак. Җәйгә таба подрядчы компания түбә һәм фасадны төзекләндерүгә керешәчәк. Кышын җиһазларны, электрүткәргечләрне, штукатуркаларны, идән өслекләрен сүтәчәкләр, шулай ук инженерлык челтәрләрен төзекләндерәчәкләр.

Җитәкче әйтүенчә, Мәдәният сараен ремонтлауга җирле бюджеттан — 390 миллион, республика бюджетыннан 160 миллионнан артык акча бүлеп бирелгән.

Бәйрәмнәр ахырына кадәр шәһәр мәдәният йорты Яңа ел чараларын уздыру өчен актив кулланылачак, ди директор вазифаларын вакытлыча башкаручы Альберт Хәбибуллин. Әмма хәзер үк бинадагы барлык концертлар һәм тамашалар белән параллель рәвештә мебель, оргтехника, декорацияләр, костюмнар һәм башка әйберләрне алып китәргә әзерләнәләр.

— Хәзер безнең алда ике өстенлекле бурыч тора: бу «сарай» мөлкәтен саклау өчен урыннар һәм коллективларыбызның дәресләре һәм чыгышлары өчен яңа мәйданчыклар табу, — дип аңлата Альберт Хәбибуллин.

Беренче мәсьәлә инде өлешчә хәл ителгән: шәһәр учреждениеләре — мәсәлән, мәдәният идарәсе карамагындагы складлар һәм подвалларга кайбер әйберләрне саклауга куеп булачак. Иҗат коллективларына килгәндә, аларның кайберләре мәктәпләрдә, «Колос» мәдәният йорты, «Барс» яшьләр үзәге, «Спутник» яшүсмерләр клубы мәйданчыкларында шөгыльләнә алачак. Хәер, бу исемлек әле тулыланачак.

Моннан тыш, Альберт Хәбибуллин сүзләренчә, персоналны — аерым алганда, җыештыручыларны һәм хуҗалык-эксплуатация хезмәткәрләрен саклап калу буенча да адымнар ясала. Вакытлыча эш таба алмасалар да, алар элеккечә штатта исәптә торып, хезмәт хакының өчтән ике өлешен алачак — беренче чиратта бу пенсионер хезмәткәрләргә кагыла.