Алабуга районында бер атна эчендә ике янгын

7 октябрьдән 13 октябрьгә кадәр Алабуга районында ике янгын теркәлгән.

7 октябрьдә сәгать 4тә 75 нче янгын-коткару бүлегенең элемтә пунктына сәүдә үзәге бинасында төтен чыгу турында хәбәр килә. Янгын стенаның пластик тышчасын һәм 10 кв. м мәйдандагы суыткыч камераларны юк итә. Бәхеткә, янгын нәтиҗәсендә һәлак булучылар һәм зыян күрүчеләр юк. Ут чыгуның сәбәбе — электр җиһазларын техник эксплуатацияләү кагыйдәләрен бозу.

2024 елның 13 октябрендә сәгать 3тә 62 нче янгын сүндерү пунктына «Кама» бакчачылык ширкәтендәге бакча йортында ут чыгу турында хәбәр килгән. Нәтиҗәдә 25 кв. м мәйдандагы бакча йорты һәм мунча яна. Зыян күрүчеләр һәм һәлак булучылар юк. Төп сәбәп шулай ук электр җиһазларын техник эксплуатацияләү кагыйдәләрен бозу.

Алабуга районы буенча күзәтчелек эшчәнлеге бүлеге халыкка янгын куркынычсызлыгы кагыйдәләрен үтәүнең мөһимлеген искә төшерә: "Электр үткәргечләренең нинди хәлдә булуын тикшереп торыгыз. Бары тик төзек электр җиһазларын гына кулланыгыз. Кабызылган электр приборларын караусыз калдырмагыз. Өйдән чыгып китәр алдыннан яки йоклар алдыннан һичшиксез барлык электр приборларын челтәрдән өзегез. Балаларны өйдә ялгыз калдырмагыз һәм аларны янгын куркынычсызлыгы кагыйдәләренә өйрәтегез. Йортыгызны, фатирыгызны янгын хәбәрчесе һәм янгын сүндерүче белән тәэмин итегез.

Бу гади киңәшләрне үтәү фаҗигаләрне булдырмаска, кешеләрнең гомерен һәм сәламәтлеген саклап калырга ярдәм итәчәк.