Алабуга укучылары хезмәт ветеранына ишегалдын кардан чистартырга булышты

Көчле кар яву чорында өлкәннәргә карата кайгыртучанлык һәм игътибар аеруча мөһим. Алабуга шәһәренең 2 нче гимназия укучылары хөрмәтле ветеран Виктор Васильевич Кусакин яшәгән йортның ишегалдын кардан чистартты.

Виктор Васильевич — күпьеллык стажлы педагог, атказанган мәгариф хезмәткәре, «Россия Федерациясенең Хезмәт ветераны» дигән мактаулы исемгә ия. Ул Алабуга районы ветераннар советы әгъзасы буларак актив иҗтимагый тормыш алып баруын дәвам итә һәм үзенең үрнәге белән яшь буынны рухландыра.

Кызлар-егетләр тиз арада йорт тирәсен тәртипкә китерде. Бу — физик ярдәм күрсәтү генә түгел, бу — ике буынның рухи очрашуы да иде, диләр укучылар үзләре. Алар ветеран белән аралашты, Виктор Васильевичның истәлекләрен тыңлады.