Алабуга хакимияте электр самокатлары прокатын тыйды. Ни өчен?

Безнең шәһәрнең инфраструктурасы бүгенге көндә мондый транспорт төренә әзер түгел — махсус полосалар, велосипед юллары, махсус билгеле юллар юк, ди Алабуга районы башкарма комитеты җитәкчесе Эльмира Әхмәдиева. Хәзер тротуарларда электр самокатлары хәрәкәте җәяүлеләргә комачаулый.

− Шуңа бәйле рәвештә юл хәрәкәте иминлеген тәэмин итү комиссиясендә электросамокатларны прокатка бирүне тыю турында карар кабул ителде. 1084 нче карар прокат пунктларын (мәсәлән, самокатлар яки велосипедлар белән) инженерлык челтәрләренең саклау зоналарында (мәсәлән, торбалар яки кабельләр янында), җәмәгать транспорты тукталышларында, кешеләр транспортка утырган урыннардан 10 метрдан да якынрак куюны тыя. Әлегә җәяүлеләр һәм электр самокатлары хәрәкәтен бергә алып бару — куркынычсыз түгел, — дип аңлатты Эльмира Әхмәдиева.

Электр самокатларын шәһәр урамнарыннан берничә тапкыр алып, җаваплы саклауга җибәрделәр. Әмма эшмәкәр һәм муниципалитет компромисс тапкан — кануннарны үтәү төп өстенлек булып кала бирә.

− Шәхсән үзем берничә тапкыр балаларның QR-код буенча самокатлар арендалауларын һәм юл хәрәкәте кагыйдәләрен белмичә йөрүләрен күрдем. Балаларыбызның тормышы һәм иминлеге кыйммәтрәк, — дип ассызыклады башкарма комитет җитәкчесе.

2024 елда кикшерингны тулысынча тыйган Пермь мисалы күрсәткеч булып тора. Гаҗәп, әмма факт: самокатлар катнашындагы юл-транспорт һәлакәтләре саны 80 нән 8 гә кадәр кимегән.

Кикшеринг — бу электр самокатларын мобиль кушымта аша кыска вакытлы арендалау системасы. Термин инглизчә kick scooter (самокат) һәм sharing (уртак куллану) сүзләреннән килеп чыккан.