Алабугада 2025 елда 50 километрдан артык юл һәм тротуарлар тәртипкә китерелгән

2025 ел — Алабуга районының юл челтәре өчен мөһим ел булды. Ремонт һәм төзелеш күләмнәре гаҗәпләндерә: 50 километрдан артык юл һәм тротуарлар тәртипкә китерелгән. Бу эшләргә 1,4 миллиард сум чамасы акча тотылган.

Район башкарма комитеты җитәкчесенең төзекләндерү буенча урынбасары Эдуард Гаязетдинов сөйләвенчә, эшләр берничә төп программа буенча алып барылган. Иң масштаблысы «Шәһәрнең торак массивларында юлларны ремонтлау» республика программасы булды, аңа 370 миллион сум акча бүлеп бирелгән. Аның кысаларында 13 километрдан артык юл ремонтланган, шул исәптән Яр Чаллы шоссесы, Әйләнеч шоссесындагы һәм шәһәрнең тарихи өлешендәге урамнардагы зур участоклар төзекләндерелгән.

Авыл җирлекләре дә игътибарсыз калмады. Юлларны ремонтлау программасы буенча торак пунктларда гомуми озынлыгы 6,5 километр булган 29 участок яңартылган. Комплекслы төзекләндерү эшләре дә дәвам итә, шулай итеп, Тихая урамында 3 километрга якын тротуар төзелгән. Шулай ук Үзәк стадион тирәсендә боҗра чишелеше төзекләндерелә, 3 яңа тукталыш павильоны корыла.

Былтыр уңайлы шәһәр мохите булдыруга аерым игътибар бирелде. Эшләр Нефтьчеләр проспектының так санлы йортлар ягында 2,7 километр озынлыкта алып барылды. Моннан тыш, Тынычлык проспекты участогын төзекләндерү эшләре төгәлләнде (Нефтьчеләр проспектыннан Яшьләр урамына кадәр 540 метр) һәм Шишкин урамы буенча 280 метр чамасы тротуар төзелде. Шәһәрнең тарихи өлешен реконструкцияләүгә шактый акча тотылды. Шулай ук М-7 трассасында Тойма елгасы аша күперне капиталь ремонтлау башланды, ул 2026 елда тәмамланачак.