Алабугада 6 метрлы Кар Аждаһасы фигурасын ясыйлар

Быел «Чебурашка» паркында алабугалыларны кардан ясалган аждаһа фигурасы сөендерәчәк. Хәзерге вакытта эш кызу темплар белән бара. Фигураны Алабуга рәссамы Виктор Селиверстов ясый.

Виктор Александрович сөйләвенчә, фигураның биеклеге 6 метр тәшкил итә. Фигура очраклы сайланмаган, ул якынлашып килүче Аждаһа елын символлаштыра.

Виктор Селиверстов алабугалыларны якынлашып килүче Яңа ел белән котлады һәм аждаһаның явыз булмавын һәм бары тик бәхет, уңыш һәм иминлек китерүен теләде. Тиздән мифик герой алабугалыларны сөендереп торачак һәм паркка Яңа ел атмосферасы бирәчәк.