Алабугада берничә урам киселешендә светофорлар яңартылачак

Быел шәһәрдә юлларны, тротуарларны һәм коммуналь челтәрләрне масштаблы ремонтлау дәвам итәчәк. Искергән светофорларны алыштыру һәм яңаларын урнаштыру — бу юл хәрәкәте куркынычсызлыгы мәсьәләсе.

Шәһәрнең юл инфраструктурасын модернизацияләү программасы кысаларында хәрәкәт аеруча җанлы булган ике урам киселешендә светофорларны алыштырачаклар: Төзүчеләр — Яшьләр (элеккеге автовокзал каршында) һәм Горький — Тугаров урамнары. Тагын бер светофорны Мәскәү — Татарстанның 10 еллыгы урамнары чатында куялар. Анда моңа кадәр светофор бөтенләй булмаган.