Алабугада «Безнең ишегалды» программасын гамәлгә ашыру нәтиҗәләре ясалды

Алабуга районында «Безнең ишегалды» программасына 217 ишегалды территориясе кертелгән. Бүген 176 ишегалды буенча эш тәмамланды, дип хәбәр итте АМР башкарма комитеты җитәкчесенең инфраструктура үсеше буенча урынбасары Андрей Томилин.

2020 елдан 2024 елга кадәр программага кертелгән ишегалларының 81 проценты ремонтланган инде. Биш ел эчендә 253,3 мең квадрат метр мәйданда юл эшләре башкарылган. Урамнарда — 722 яңа багана, балалар өчен, спорт һәм урам җиһазлары булган 2754 элемент куелган.

Быел программа кысаларында 14 ишегалдында 133,9 миллион сумлык эшләр тәмамланган. Җитәкче билгеләп үткәнчә, халыкка программада катнашу өчен үз ишегалдын сайлау мөмкинлеге бирелгән иде. Моның өчен дәүләт һәм муниципаль хезмәтләр порталында тавыш бирү оештырылды. Шулай итеп, быелгы 14 йортның бишесе программага тавыш бирү нәтиҗәсендә кергән.

16 апрель көнне ишегалларында халык белән деталь схемаларны тәкъдир итү буенча җыелышлар үткәрелде, машина кую урыннарын арттыру, теге яки бу кече архитектура формаларын урнаштыру мәсьәләләре каралды. Халыкның теләкләре подрядчылар тарафыннан исәпкә алынды.

Әлеге программа ресурслар белән тәэмин итүче оешмалар тарафыннан челтәрләрне алыштыруга да ярдәм итә, дип билгеләп үтте Андрей Томилин. Әйтик, «Алабуга» махсус икътисади зонасының су белән тәэмин итү һәм ташландык суларны агызу департаменты программасы буенча асфальт салынганчы өч ишегалдында күпфатирлы йортларны салкын су белән тәэмин итү челтәрләре алыштырылган.

Алабуганың җылылык челтәрләре предприятиесе тарафыннан ике ишегалдында җылылык һәм кайнар су белән тәэмин итү челтәре алыштырылган, ике җылылык камерасы норматив хәлгә китерелгән. Челтәр компаниясе көче белән Тынычлык проспектындагы 34 нче йорт ишегалдында фасад яңартылды. Подряд оешмасы ишегалларында 71 яңа багана урнаштырды.

Кече архитектура формалары үз эченә 240 элементны алган. Шул исәптән 9 балалар уен комплексы, 29 атынгыч һәм карусель, 8 комлык, 3 хуҗалык көнкүреше элементы, 77 эскәмия, 65 урна куелган, каты көнкүреш калдыклары өчен 6 урын җиһазландырылган. Шулай ук «Безнең ишегалды» программасы кысаларында 4 спорт комплексы, спорт җиһазлары һәм тренажерларның 11 элементы урнаштырылган. Быел барлык 14 ишегалдында да идарәче оешмалар газон үләне чәчкән, агачлар утыртылган.

Программа акчаларыннан тыш, өстәмә финанслау чыганаклары җәлеп ителә: бу идарәче компанияләр һәм җирле бюджет акчалары. Идарәче компанияләр акчасына 20 эскәмия, 20 урна куелган, 200 мең сумлык агач утыртылган. Ә Тынычлык проспектындагы йортта җирле бюджет хисабына спорт мәйданчыгы коймасын алыштырганнар.

Халык соравы буенча йортлар җылытылган, җәяүлеләр өчен тротуар челтәре салынган, парковкалар киңәйтелгән, ял итү зоналары төзекләндерелгән, фонарьлар арткан. Яңартылган территорияләрне ачу тантанасы «Ишегалды бәйрәмнәре» ндә узды.

Андрей Александрович «Безнең ишегалды» программасын гамәлгә ашыру кысаларында төзелгән яңа иҗтимагый киңлекләргә сакчыл карарга өндәде.