Алабугада «Форпост» яшьләр үзәге: 13 ел хокук сагында

Быелның ун аенда яшьләр үзәге башкарган эш нәтиҗәләре белән «Форпост» директоры Любовь Степанова таныштырды. Җитәкче билгеләп үткәнчә, учреждение моннан 13 ел элек булдырылган һәм аның хезмәткәрләре бу вакыт эчендә бик яхшы нәтиҗәләргә ирешкән. Хәзер «Форпост» штатында тугыз кеше бар, һәм аларның һәркайсы югары профильле белемгә ия.

Любовь Степанова сүзләренчә, учреждение эшчәнлегенең төп юнәлешләреннән берсе — Алабуга муниципаль районында яшьләр хокук саклау хәрәкәтен үстерү. Әйтергә кирәк, ул уңышлы гамәлгә ашырыла: шәһәрнең һәм районның һәр мәктәбендә, гимназияләрдә һәм балалар йортында хокук бозуларны профилактикалау буенча мәктәп һәм «Форпост» отрядлары булдырылган. Моннан тыш, югары уку йортлары һәм махсус урта уку йортлары базасында шулай ук дүрт студент отряды һәм эшче яшьләр арасыннан бер оператив отряд оештырылган. Бүгенге көндә муниципалитетта барлыгы 720 кешедән торган 45 шундый отряд исәпләнә.

— Учреждение эшчәнлегенең төп күрсәткече булып хокук бозуларны профилактикалау тора. Шуңа күрә «Форпост» хезмәткәрләре, полиция җитәкчелеге, оператив һәм студент отрядлары хезмәткәрләре белән берлектә, яшьләрнең күпләп җыелу урыннарын һәм массакүләм чаралар үткәрү урыннарын, имин булмаган гаиләләрне һәм юл хәрәкәте иминлеге өлкәсендә исәптә торучы яшүсмерләрне тикшерү буенча рейдларда актив катнаша, — дип сөйләде Любовь Степанова.

2024 елда "Форпост«чылар Алабуга уку йортларындагы 96 чарада һәм 50 шәһәр чарасында җәмәгать тәртибен саклаган — аерым алганда, алар Сабантуй, Спас ярминкәсе, Борис Березовскийның «Алабугада җәйге кичләр» музыкаль фестивален үткәргәндә җәлеп ителгән.

— "Форпост«та яшьләр үсешенең патриотик, спорт һәм мәдәни аспектларын да онытмыйлар, — диде директор. — 2024 елда үзәк тарафыннан 60ка якын чара әзерләнде һәм уздырылды: шәһәр күләмендә хәрби-патриотик спартакиадалар, «Форпост» отрядларының шәһәр үзешчән сәнгать фестивале, строй җыры смотр-конкурслары, шул исәптән Бөек Ватан сугышында Җиңүнең 79 еллыгына багышланган чаралар.

Моннан тыш, 2022 елның ноябереннән «Форпост» хезмәткәрләре МХО сугышчыларына ярдәм күрсәтүдә актив катнаша: учреждение бинасында маскировка челтәрләрен үрү өчен өстәл урнаштырылган. Бүгенге көнгә 67 маскировка челтәре хәрби хәрәкәтләр урынына җибәрелгән.

Любовь Степанова ассызыклаганча, Алабуга районының «Форпост» үзәге эш нәтиҗәләре буенча 2017, 2019, 2020, 2021 һәм 2022 елларда «Татарстан Республикасы муниципаль берәмлекләренең иң яхшы «Форпост» үзәге» исеменә республика конкурсында һәм 2019, 2021, 2022 һәм 2024 елларда «Закон территориясе» республика конкурсында җиңүче булган.

— Озакламый без истәлекле датаны билгеләп үтәчәкбез: бу елның 29 нояберендә Алабуга муниципаль районында яшьләрнең хокук саклау хәрәкәтенә 25 ел тула. Тантаналы чара «Йолдызлык» мәдәни үсеш үзәгендә узачак. Анда хөрмәтле кунаклар сыйфатында республиканың «Форпост» үзәге ветераннары һәм шәһәрдә хокук саклау эшчәнлеген торгызуда катнашкан Алабуга хәрәкәте вәкилләре чакырылды, — дип хәбәр итте Любовь Степанова.

Ул «Форпост» үзәгенең киләсе елга планнары турында да сөйләде. Элекке бурычлардан тыш, яшьләр арасында милләтара һәм конфессияара толерантлыкны арттыруга, этник һәм конфессиональ дошманлык нигезендә экстремистик берләшмәләр формалашуны булдырмауга аерым игътибар биреләчәк.