Алабугада яшь укытучыларга ярдәм итү өчен муниципаль грант булдырылды

Алабуга районының мәгариф тармагында берничә проблема бар, дип билгеләп үтте Рөстәм Нуриев. Алар арасында ул кайбер учреждениеләрнең матди-техник яктан канәгатьләнерлек булмавын, биология һәм химия буенча БДИ нәтиҗәләренең кимүен, Бөтенроссия олимпиадаларында нәтиҗәлелекнең түбән булуын атады. Авыл һәм шәһәр мәктәпләрендә фән укытучылары, ашханәләрдә эшләүчеләр җитмәү мәсьәләләре хәл ителмәгән кала. Балигъ булмаганнарның хокук бозулар саны артуы сагайта.

Педагогик кадрларны җәлеп итү һәм аларга ярдәм итү өчен муниципалитет берничә проектны гамәлгә ашыра. Мәсәлән, авыл мәктәпләрендә вакансияләрне ябу өчен «Мобиль укытучы»ларга соңгы өч елда биш автомобиль тапшырылган. 2022 елдан «Безнең яңа укытучы» гранты эшли. Өч ел эчендә муниципалитет хисабына КФУның Алабуга институты көллиятенә 16 кеше укырга җибәрелгән, шуларның бишесе — узган елда.

Яшь белгечләргә ярдәм итү өчен быел 400 мең сум күләмендә муниципаль грант булдырылды. Бер тапкыр бирелә торган түләүне 3 елга кадәр стажы булган, алдагы 5 ел дәвамында биләгән вазифасында эшләү шарты белән яшь укытучылар алачак. 

Мәктәпкәчә учреждениеләр өчен учреждение хезмәткәрләренең балалары һәм оныкларының балалар бакчаларына бушлай йөрү системасы эшләнә.

Мәктәп ашханәләрендә яңа уку елыннан АБК «Пеймент» операторы тарафыннан яңача туңдырылган азык-төлек продуктлары китереләчәк. Яңа технология ашханә хезмәткәрләренең хезмәт чыгымнарын киметергә мөмкинлек бирәчәк.