Алабугада яшәүче махсус операция хәрбиләре һәм ветераннары үзләренең спорт командасын төзергә тели

Алабуганың «Барс» яшьләр үзәгендә «Татарстан Республикасы Рәисе спорт Кубогы» ярышларының беренче этабында катнашучылар белән очрашу булды. Алабуга җитәкчелеге вәкилләре һәм махсус хәрби операциядә катнашучылар мөһим мәсьәләләр турында фикер алышты.

Махсус хәрби операциядә катнашучылар — Равил Гобәйдуллин, Александр Николаев һәм Андрей Че мондый дәрәҗәдәге ярышларда катнашу тәҗрибәсе турында сөйләде. Алар махсус операция хәрбиләре өчен тыныч тормышта да үзеңне кирәкле итеп тоюның (спортта чын көрәшче булу, халык дружиналарында кешеләрнең иминлеген саклау, сайлаган һөнәр буенча эшләү, яшьләр өчен үрнәк булу) ни дәрәҗәдә мөһим икәнен искәртте.

Алабуга районы башкарма комитеты җитәкчесенең социаль үсеш буенча урынбасары Елена Мерзон, «Ватанны саклаучылар» фонды координаторы Таңсылу Хөснуллина, Алабуга районы Ветераннар советы рәисе Геннадий Баганов, Алабуганың иҗтимагый һәм спорт оешмалары җитәкчеләре геройлар белән уртак эш перспективалары турында фикер алышты.

Планда — нарда, футбол командасы секцияләрен булдыру, өстәл теннисы, шахмат, бильярд, ату, кышкы спорт төрләре һәм башка юнәлешләрне үстерү, шулай ук команда белән төрле дәрәҗәдәге турнирларда катнашу.

«ТР Рәисе Кубогы — сугышчан дуслар белән очрашу өчен менә дигән мөмкинлек. Спорт безне сәламәт яшәү рәвеше тирәсендә берләштерә, сугыш хәрәкәтләреннән соң тыныч тормышка җайлашырга ярдәм итә. Безнең сугышчан иптәшләрнең, яралануга да карамастан, җиңүгә омтылышларын күрү кызык иде. Киләчәктә дә шундый чараларда катнаша алырмын дип ышанам», — диде ярышларда катнашучы Андрей Че.