Алабугада импортны алмаштыра торган аккумуляторлар производствосын эшләтеп җибәрделәр

Алабуга аккумулятор заводы («Кориб» компанияләр төркеменә керә) Сәнәгатьне үстерү фонды ярдәмендә (ВЭБ координацияләнә. РФ Сәнәгать һәм сәүдә министрлыгы йөкләмәсе буенча) җиңел һәм йөк автомобильләре өчен EFB технологиясе буенча импортны алмаштыра торган аккумуляторлар производствосын эшләтеп җибәрде. Бу хакта фонд матбугат хезмәтенә сылтама белән ТАСС хәбәр итә, дип яза «Татар-информ».

Бер ел эчендә предприятие 80 мең берәмлеккә кадәр аккумулятор чыгара алачак. Гомуми инвестицияләр якынча 157 млн сум тәшкил иткән. Аерым алганда, ЕАЗга «Үсеш проектлары» уртак федераль-төбәк программасы буенча ташламалы кредит бирелде: 97,5 млн сумны Сәнәгатьне үстерү фонды, ә 10,8 млн сумны ТР Инвестиция-венчур фонды юнәлдергән, дип билгеләп үттеләр ФРП матбугат хезмәтендә.

EFB — сыек электролит кулланыла торган яхшыртылган аккумулятор батареялары. Алар кургашын-кислота аккумуляторларыннан 45% ка тизрәк заряд туплыйлар, югары сыйдырышлылыкка һәм хезмәт итү вакытына ия, шулай ук түбән үзкыйммәткә һәм җибәрү тогы күрсәткечләре 30% тан 50% ка кадәр яхшыртылган.

Мондый батареяларны КАМАЗ җитештергән йөк машиналарында һәм махсус техникада, җиңел автомобильләрдә, шулай ук сәнәгать, электр энергетикасы һәм телекоммуникация инфраструктурасы объектлары өчен резерв туклану чыганаклары буларак кулланалар.

Хәзер, компания мәгълүматы буенча, EFB-аккумуляторларның Россия икенчел базарында чит ил җитештерүчеләренең өлеше 80% чамасы тәшкил итә. Проект куәтенә чыккач, завод әлеге сегментның 8% тын биләргә ниятли. Локальләшү дәрәҗәсе 100% тәшкил итә, җитештерүдә бары тик үзебезнең чимал гына кулланыла.