Алабугада «Йөзү буенча күмәк белем бирү» проекты ахырына якынлашты

«Йөзү буенча гомуми белем бирү» проекты тантаналы чара белән тәмамланды. Йөзү нечкәлекләренә төшенгән укучыларны әлеге бәйрәм белән котларга мәртәбәле кунаклар да килде.

Район башкарма комитеты җитәкчесе Эльмира Әхмәдиева проектның уникальлеген һәм әһәмиятен билгеләп үтте:

«Бу чыннан да бәйрәм. Сез тормышта һичшиксез кирәк булачак күнекмәләрне үзләштердегез. 4 ел эчендә 4 меңнән артык бала йөзәргә өйрәнгән — бу лаеклы нәтиҗә. Безгә алга таба да бу эшне дәвам итәргә кирәк».

Рәсми өлештән соң күрсәтмә йөзүләр булды. Йомгаклап, мәртәбәле кунаклар балаларга истәлекле медальләр тапшырдылар.
Уникаль проект инде дүртенче ел район башлыгы Рөстәм Нуриев һәм шәһәрнең йөзү федерациясе президенты Вадим Махеев инициативасы белән гамәлгә ашырыла. Бу вакыт эчендә меңнәрчә икенче сыйныф укучысы йөзәргә өйрәнгән. Бу уку елында инженер-технологик лицей базасында йөзү буенча беренче махсуслаштырылган спорт сыйныфы ачылды, анда 28 укучы шөгыльләнә. Балаларның инде беренче уңышлары бар: диңгез пехотасы ветераннары призына республика турнирында өч укучы өченче спорт разрядын үтәде, тагын өчесе элегрәк алган өченче спорт разрядын раслады.