Алабугада «Минем гаиләм — минем илһамым» конкурсына йомгак ясадылар

«Йолдызлык» мәдәни үсеш үзәгенең уңайлы залында конкурста катнашучылар, ярдәм итү төркемнәре һәм тамашачылар, мәртәбәле кунаклар җыелды.

Алып баручы Наталья Прохорова кунакларны җылы сәламләде. Гаиләне саклау, мәхәббәткә тугры калу, гаилә кыйммәтләрен балаларга тапшыру турында Гаилә елында аеруча еш сөйләнде.

Чыгышлар башланганчы әти-әниләргә һәм балаларга АМР башкарма комитеты җитәкчесенең социаль үсеш буенча урынбасары Надир Курамшин, «Йолдызлык» мәдәни үсеш үзәге директоры Елена Морозова, «Татарстан-Яңа гасыр» Югары Советы башкарма комитеты рәисе Алсу Тарханова котлау сүзләрен җиткерделәр.

Һәм менә залдан сәхнәгә фестивальдә катнашучылар менә. Бу җиде иҗади гаилә — Гусевлар, Котельниковлар, Камалетдиновлар, Сабитовлар, Сәлаховлар, Черемныхлар, Хәбибуллиннар. Алар һәрберсе җиңүгә өметләнә. «Йолдызлык» мәдәни үсеш үзәгенең сәнгать җитәкчесе Гөлназ Сабирова да борчыла, чөнки мондый зур чараларны оештыру — һәрвакыт зур җаваплылык.

Конкурсантлар әзерләнгән мәлдә, алып баручы «Тамашачылар симпатиясе» призына тавыш бирү башлануын игълан итә. Экранда тавыш бирү битенә узу өчен QR-код барлыкка килә. Бүләк — җырчы Евгений Григорьевның Чаллыдагы юбилей концертына ике билет.

Менә конкурс башланып китә. Беренче булып сәхнәгә улы һәм кызы белән «Август-Алабуга» компаниясе хезмәткәре Лариса Гусева чыга. Алар фортепианода һәм гитарада уйный. Бу кичне алар «Про семью» җырын башкардылар.

Бер-бер артлы башка катнашучылар башкаруында «Улыбайся», «Мама мамочка», «Крылья ангела», «Наши дети» һәм башка җырлар яңгырый. Алып баручы тамашачыларны һәр гаилә белән таныштыра, аларның һөнәрләре һәм мавыгулары турында сөйли, бер-береңә ярдәм итүнең, татулыкта яшәүнең мөһимлеген ассызыклый.

Людмила Сәлахова сәхнәгә кечкенә кызы Альвина белән чыкты. Людмила вокал белән профессиональ рәвештә шөгыльләнә — «Новое поколение» талантлар студиясе белән җитәкчелек итә. Ә Альвина балалар бакчасына йөри, җырларга һәм биергә ярата. Тамашачыларга алар «Милые, добрые взрослые, отмените войну» җырын тәкъдим иттеләр. Күпләрнең күзләрендә бу җырдын яшь ялтырады...

Хәбибуллиннар гаиләсе Алабуга тамашачысын үзләренең чыгышлары белән еш сөендерә, сәхнәдә алар үзләрен иркен хис итә. 2015 елда алар «Нечкәбил» республика конкурсында призер булганнар, башка гаилә конкурсларында да җиңүләре шактый. Альберт белән Диләрия бу кичне татар телендә җыр башкардылар.

«Тамашачылар симпатиясе» призына тавыш бирү нәтиҗәләре буенча нәкъ менә Хәбибуллиннар җиңүче булып танылды, аларга концертка билетлар бүләк ителде.

Конкурста катнашучыларның барысы да иганәчеләрдән бүләкләр һәм призлар алды. «Йолдызлык» мәдәни үсеш үзәге хезмәткәрләрен дә мәдәният идарәсенең Мактау грамоталары белән бүләкләделәр.

Тамашачыларны үзләренең чыгышлары белән опера җырчысы, халыкара конкурслар лауреаты, 2023 елгы Шаляпин стипендиясе иясе, якташыбыз Надежда Игнатьева һәм Казан шәһәреннән халыкара джаз фестивальләре лауреаты Марсель Гафиев сөендерде.

Ә бәйрәм азагында «Гаилә гимны» яңгырады.