Алабугада музей-белем бирү үзәге булдыру планлаштырыла

ТР Дәүләт Советы Рәисе урынбасары Татьяна Ларионова катнашындагы киңәшмәнең икенче өлешендә полилингваль комплекс базасында Россиядә беренче булачак музей-белем бирү үзәген булдыру мәсьәләсе буенча фикер алыштылар.

– Алабуга – туристик, музей, мәдәни байлык һәм үзенчәлекләре белән аерылып торган шәһәр. Шуңа күрә без музей, мәдәният, тарих темасын гомуми белем бирү процессы эчтәлегенә кертергә теләр идек. Хәзерге вакытта музей-белем бирү үзәге өчен бүлеп бирелгән биналарны реконструкцияләү эшләре бара. Ул Россиядә мондый масштабтагы беренче булачак. Полилингваль мәктәптә узачак август конференциясенә бу үзәкнең дә файдалануга тапшырылуын теләр идек, – дип билгеләп үтте Татьяна Ларионова.

Алабуга дәүләт тарих-архитектура һәм сәнгать музей-ядкарьлеге генераль директоры Гөлзада Руденко сүзләренә караганда, бүген музей үзәге булдыру өчен бүлеп бирелгән биналарны реставрацияләү эшләре бара. “Бу музей эшендә алга китеш булачак”, – дип өстәде Татьяна Ларионова.

Музей-белем бирү үзәгендә IT-технологияләргә басым ясалачак. Мәктәп предметларын биредә яңа технологик дәрәҗәдә укытачаклар.

Биредә белем бирүнең өч телдә – рус, татар һәм инглиз телләрендә алып барылачагын исәпкә алып, кадрларның ничек сайланачагы, яңа мәктәптә кем укый алачагы турында фикер алыштылар. Белгечләрне күрше шәһәрләрдән дә, бөтен республикадан да җәлеп итү планлаштырыла.