Алабугада Раштуа могҗизалары

Ел саен 7 гыйнварда христиан дөньясы иң мөһим бәйрәмнәрнең берсе — Раштуа бәйрәмен билгеләп үтә. Православие дине вәкилләре өчен бу Пасхадан соң әһәмияте буенча икенче вакыйга. Безнең илдә Раштуа X гасырда, Русь чукындырылганнан соң кертелә. Ә бәйрәм ярминкәләре, күңел ачулар, баллар оештыру һәм өйләрдә бизәкле чыршы кую гадәте безгә бары тик XIX гасырда гына Европа илләреннән килә.

Спас соборы башлыгы иеромонах Кирилл (Забавнов) алабугалыларны шушы матур бәйрәм белән котлады:

— Бу бәйрәм безне барыбызны да догада берләштерә. Без бүген, узган елдагы кебек үк, илебез, сугышчыларыбыз, гаиләләребез тынычлыкта яшәсен дип дога кылабыз. Бүген христиан храмнарында догалар укуыбызга, Гайсә исеме белән гыйбадәт кылуыбызга 2025 ел. Бәйрәм белән сезне!

Раштуа төнендә Спас соборында бәйрәм литургиясе узды. Ә 7 гыйнвар иртәсендә мәхәллә кешеләре яңадан гыйбадәтханәдә гыйбадәт кылуга җыелдылар. Иеромонах Кирилл бәйрәмнең тарихы турында әңгәмә үткәрде. Соңрак Раштуа чыршысы булды, анда балаларга Кар Кызы һәм Кыш Бабай катнашында әкият күрсәтелде. Әлбәттә, сабыйларның барысына да бүләкләр таратылды.

Бу якты бәйрәмдә собор йөзләгән алабугалыларны кабул итте. Олылар, балалар һәм сабыйлар тынычлык өчен, туганнары һәм якыннары өчен дога кылырга җыелды.

«Җаныңны ашаткач, тәнеңне дә ашат» кагыйдәсенә нигезләнеп, кыр кухнясы оештырылган иде, анда теләгән һәркем традицион сыйлардан авыз итә алды.

Алга таба бәйрәм «Чебурашка» паркында дәвам итте. Кичәнең төп вакыйгасы рус халык театры чыгышы булды. Артистлар тамашачыларны юмор, дәртле җырлар һәм интерактив уеннар белән сөендерделәр, тамашачыларны Раштуа әкиятенә җәлеп иттеләр. Монда һәр кеше үзенә уен таба алды.

Бәйрәмне махсус кунак Григорий Галкин башкаруында күңелле җырлар ачып җибәрде. Салкын булуга карамастан, паркта бәйрәм рухы хөкем сөрде, ә кунакларның йөзләрендә елмаю балкый иде. Тамашачы яраткан артистка кушылып җырлады.

«Инвожо», «Забавушка», «Ак каз» һәм «Красная гвоздика» халык ансамбльләренең чыгышлары алабугалыларны таң калдырды, аларның дәртле җырларына аяклар үзләре биеде.

— «Забавушка»ның, ялгышмасам, 1997 елдан бирле Раштуаны барлык гореф-гадәтләренә туры китереп бәйрәм итү традициясе бар. Хәер, мин үзем мөселман булсам да, бу уртак бәйрәм дип саныйм. Татарстанда кешеләр, милләтләре һәм диннәре төрле булуга карамастан, бер-берсенә хөрмәт белән карыйлар. Гомумән, мин үземне дөнья диннәре кешесе дип саныйм. Бу якты бәйрәмдә, әлбәттә, тынычлык һәм сәламәтлек телисе килә. Яңа эшләргә көч булсын өчен, сәламәтлек турында үзебезгә кайгыртырга кирәк, — диде «Забавушка» коллективы катнашучысы Фрида Шакирова.

«Чебурашка» паркындагы тамаша алабугалыларның йөрәкләрендә онытылмаслык тәэсирләр һәм кышкы әкият тойгысы калдырды.