Алабугада сәяси репрессияләр корбаннарын искә алдылар

30 октябрь көнне илебез сәяси репрессия корбаннарын искә ала. Бу — язмышлары яраланган, судсыз һәм тикшерүсез атып үтерелгән миллионлаган кешене искә алу көне.

Алабугада сәяси репрессия корбаннары мемориалы янында хәтер көненә багышланган матәм митингы узды. Бу кайгылы көнне шәһәр халкы репрессияләр нәтиҗәсендә язмышлары җимерелгән якташларын искә алу өчен җыелды.

Чара Алабуга мәдәният һәм сәнгать көллияте студентлары башкаруында театральләштерелгән тамаша белән башланды. Ирина Головкинаның «Аккош җыры» («Лебединая песнь») романыннан өзек һәм Т. Русловның шигырьләре яңгырады.

Шәһәр халкына мөрәҗәгать белән АМР башкарма комитеты җитәкчесенең социаль үсеш буенча урынбасары Елена Мерзон чыгыш ясады. Ул тарихның бу фаҗигале бите Алабуга районын да читләтеп үтмәде, дип ассызыклады.

«1600дән артык якташыбыз репрессияләргә дучар ителде, 135 кеше атып үтерелде. Аларның исемнәре бу мемориалда мәңгегә уеп язылган. Атып үтерелгәннәр арасында — 36 алабугалы. Имгәнгән язмышлар безгә төп кыйммәтне — кеше тормышын, бер-беребезгә сакчыл мөнәсәбәтнең мөһимлеген искә төшерә», — диде Елена Ефимовна.

Бүген районда репрессияләрдән зыян күргән яки репрессияләнгән ата-аналарның балалары булган 29 кеше яши. 27 ел дәвамында Алабугада Сәяси репрессия корбаннары советы эшли, ул әлеге коточкыч вакыйгаларның шаһитларын берләштерә.

Совет рәисе Шәмсия Мингалимова, җыелганнарга мөрәҗәгать итеп, мемориалның символик булуын билгеләп үтте. «Бу һәйкәл безгә коточкыч фаҗига, бернинди гаебе булмаган кешеләрне — галимнәрне, талантлы белгечләрне, хезмәт алдынгыларын юк итү турында искә төшерә. Онытмаган һәркемгә рәхмәт. Минем яшьтә мондый игътибар — зур бәхет», — дип уртаклашты ул.

Митингта шулай ук АМР ветераннар советы рәисе Геннадий Баганов һәм президиум әгъзасы Рәхим Гайсин катнашты.

Чара мемориалга чәчәкләр салу һәм бер минут тынлык белән тәмамланды: алабугалылар гаепсез һәлак булганнарны искә алдылар.