Алабугада Ватанны саклаучыларның туганнары өчен мастер-класс узды

18 январь көнне «Барс» яшьләр үзәгендә махсус хәрби операция барышында ирләре, уллары, абыйлары һәм әтиләре һәлак булган хатын-кызлар һәм балалар өчен рәсем сәнгате буенча мастер-класс узды.

Акциянең инициаторлары — Алабуга мәдәният һәм сәнгать көллияте, Алабуга муниципаль районының Ватанны саклаучылар фонды һәм яшьләр үзәге. Ләкин вакыйганың йөрәге дип педагог-рәссам Марина Симонованы атарга була, ул катнашучылар өчен кышкы пейзажны акрил буяулар белән язу буенча дәрес үткәрде.

Әмма очрашу палитра һәм пумалалардан түгел, ә тирән шәхси әһәмияткә ия булган вакыйгадан башланды. Марина Симонова туганнарына аларның геройларының портретларын тапшырды. Бу «хәтер галереясе» нең тарихы моннан бер ел элек башлана.

«Узган елның 23 февралендә Алабугада сугышчыларыбызга багышланган видеоролик күрсәттеләр. Кадрларда иремне күргәч, мин бик көчле хисләр кичердем, — дип уртаклаша Марина. — Икенче көнне проект идеясе туды. Геройларны истә тоту бик мөһим: аларның гаиләләре, балалары калган, Алар Ватанны саклаган. Аларның портретларын язарга булдым. Студентларны чакырдым — күпләр өчен бу портрет өстендә эшләүнең беренче тәҗрибәсе иде. Стоп-кадрлар буенча без 13 эш булдырдык, алар ел буе бу үзәктә күргәзмә тәшкил итте».

Тантанадан соң мастер-класс башланды. Марина җитәкчелегендә катнашучылар Алабуга шәһәрлегенең кышкы күренешен ясадылар. 

Күп кенә хатын-кызлар өчен бу мастер-класс мондый аралашу һәм иҗатның беренче тәҗрибәсе булды.