Алабугада законсыз төзелгән гаражлар белән көрәш бара

Төп игътибар күпфатирлы йортларга куркыныч якынлыкта урнашкан корылмаларга бирелә.

Әмма мондый корылмаларның барлык кулланучылары да килешүгә барырга әзер түгел. Бу очракта мәсьәлә суд аша хәл ителә.

Район башкарма комитеты җитәкчесенең инфраструктура үсеше буенча урынбасары Андрей Томилин сөйләгәнчә, гражданнарның аңлы булуының ачык мисалы булып Мәскәү урамы, 192а, 186а, б, в йортлары территориясендәге законсыз гаражларны сүтү күренеше тора. Кешеләр, хокук бозуларын аңлап, законсыз төзелгән корылмаларын сүтәләр.

Әмма бу эштән баш тартучылар да бар. Мондый хәл Городищенская урамы, 7 адресы буенча күзәтелә, анда янгынга каршы нормаларга туры килми торган 20 гараж һәм хуҗалык корылмалары урнашкан. «Жилкомфортсервис» идарәче компаниясе аларны судка бирергә мәҗбүр була.

«15 ноябрьдә Алабуга шәһәр судының ике карары законлы көченә керде, — дип билгеләде Андрей Томилин. — Суд дәгъва таләпләрен канәгатьләндерде, әлеге объектларны йорт яны территориясендә законсыз урнаштыру фактын һәм аларның янгын куркынычсызлыгы таләпләренә туры килмәвен ачыклады. Бу гаражлар сүтеләчәк».

Шундый ук хәл Спасская урамында да килеп чыккан, анда ике гаражның берсе торак йорт диварына терәлеп тора, димәк, турыдан-туры куркыныч тудыра.

Әлеге төзелешне үзләре сүтәргә принципиаль риза булмаган хуҗалар өчен нәтиҗәләр финанс характерда булачак. Аларга 20 мең сум күләмендә дәүләт пошлинасын, шулай ук төзелеш чүп-чарын сүтү һәм утильләштерү буенча алдагы эшләр белән бәйле барлык чыгымнарны түләргә туры киләчәк.

Шунысы мөһим: бу чараларның максаты — тәртип урнаштыру гына түгел, ә алабугалыларның гомерен һәм сәламәтлеген саклау. 

«Гаражлар йортка бик якын тора, бу янгын куркынычсызлыгы кагыйдәләрен боза. Шуның аркасында янгын чыгу куркынычы арта», — дип ассызыклады җитәкче.

Шәһәр җитәкчелеге мондый корылмалары булган барлык кешеләргә вәзгыятькә аңлап карауларын һәм суд тикшерүләрен көтмәүләрен сорап мөрәҗәгать итә. Ирекле демонтаж — ул законны үтәү генә түгел, ә куркынычсызлыкның нигезе дә.