Алабугалылар "Татар моңы" бәйгесендә җиңү өчен көрәшәчәк

Сайлап алу турлары бу елның 15 мартына кадәр уза, әмма инде бүген үк Алабугадан икенче турга кемнәр үтүе билгеле булды. Алар – шәһәр мәдәният йортының “Рәйхан” халык вокаль ансамбле солисткасы Раушания Гыйбадуллина һәм Алабуга мәдәният һәм сәнгать көллиятенең “Музыкаль эстрада сәнгате” фәнни-цикл комиссиясе укытучысы Айзилә Вахитова. Конкурс шартлары буенча, һәр турда икешәр татар халык җырын башкарырга кирәк, шуларның берсе – РСФСРның һәм ТАССРның халык артисты Илһам Шакиров репертуарыннан. Исегезгә төшерәбез, 2019 елда ТР Президенты Рөстәм Миңнеханов карары белән конкурска аның исеме бирелде. Конкурсның II туры 2020 елның 17-18 апрелендә Казан дәүләт мәдәният институтында узачак. III тур – 19 апрельдә Габдулла Тукай исемендәге Татар дәүләт филармониясендә. Гала-концерт 2020 елның 21 апрелендә Галиәсгар Камал исемендәге Татар дәүләт академия театрында үткәреләчәк.