Алабугалыларга сатып алынган даруны кайсы очракларда кире кайтарып булу турында сөйләделәр

Бу кагыйдәләр даруларга да, медицина эшләнмәләренә дә кулланыла, дип аңлата Татарстан Республикасы Дәүләт алкоголь инспекциясенең Яр Чаллы территориаль органы.

Тиешле сыйфатлы даруларны алмаштыру яки кире кайтару мөмкин түгел. Хәтта кулланучы сатып алганнан соң даруханәдән әле чыгып китмәсә дә, ул даруны кире кайтара алмый. Фармацевт чек биргәннән бирле, товарны кире кайтару мөмкин түгел. 

Сыйфатсыз дару препаратларына килгәндә, Россия Федерациясе "Кулланучылар хокукларын яклау турында"гы Законының 18 нче статьясында әйтелгәнчә, кулланучы күренеп торган яки яшерен кимчелекләре булган товарны кире кайтарырга хокуклы.

Даруның кимчелеге түбәндәгечә булырга мөмкин:
— яраклылык вакыты тәмамланган;
— маркировкалау дефекты бар (серия һәм яраклылык вакыты бөтенләй күрсәтелмәгән, яисә упаковкада һәм препаратта яраклылык вакыты туры килми);
— даруны куллану буенча инструкция юк яки башка препаратныкы салынган;
— инструкциядәге даруның тасвирламасы аның төсенә, исенә, упаковкасына, дозасына, зурлыгына, формасына яки консистенциясенә туры килми;
— препарат упаквокасында җитешсезлек бар (мәсәлән, тартмасы, пробкасы яки капкачы бозылган, шешәсенең яньчелгән урыннары бар, герметиклык бозылган һ.б.).

Кулланучыларга дарулар сатып алганда игътибарлы булырга һәм товарны кассадан китмичә тикшерергә киңәш ителә!