Алабугалыларны « Алабуга Skills»та катнашырга чакыралар

2020 елда Алабугада «Һөнәре буенча иң яхшы» муниципаль конкурс үткәрелгән иде. 2022 елдан ул «Алабуга-skills» республика бәйгесе статусын алды. Быел ул дүртенче тапкыр үткәрелә.

Фаразлар буенча, быел ачык чемпионатта Татарстаннан һәм күрше төбәкләрдән 350 катнашучы көч сынашыр дип көтелә. Осталыкта предприятие һәм учреждениеләрнең 17 яшьтән өлкәнрәк хезмәткәрләре ярышачак. Бер компаниядән һәр номинация буенча ике катнашучы кертелә.

Конкурсны уздыру мәйданчыклары Алабуга политехника көллияте, «Прогресс» автомәктәбе, «Алабуга» МИЗ «Алабуга-Политех» мәгариф үзәге, «МТЗ-Татарстан» сәүдә-сәнәгать комплексы булачак.

Номинацияләр арасында — токарь һәм фрезер эшләре, эретеп ябыштыру, автомобильләрне ремонтлау һәм аларга хезмәт күрсәтү, машиналарны буяу, төягеч белән идарә итү, сәнәгать автоматикасы, авыл хуҗалыгы машиналарын эксплуатацияләү, шәфкать туташы эше һәм башкалар.

Автомәктәп базасында С һәм D категорияле машина йөртүчеләр ярышачак.
Ачык чемпионатта җиңүчеләр 20 меңнән 50 мең сумга кадәр акчалата призлар, шулай ук дипломнар һәм кубоклар алачак.

Катнашуга гаризалар 2025 елның 29 гыйнварына кадәр konkursalabuga@mail. ru электрон адресы буенча кабул ителә. Элемтә өчен телефоннар: 8 (85557) 4-48-97, 4-48-95.

Конкурс эшче һөнәрләренең популярлыгын арттыруга, яшьләрдә сайланган белгечлеккә кызыксынуны үстерүгә, хезмәткә иҗади мөнәсәбәткә, сәламәт көндәшлеккә һәм үз компетенцияләренә ышаныч булдыруга юнәлтелгән. Оештыручылар — Татарстан Республикасы Мәгариф һәм фән министрлыгы, Татарстан Республикасы сәнәгать һәм сәүдә министрлыгы.