Алабугалыларны Сосновский борщевигын чапмаган өчен штрафлар көтә

Татарстанда Сосновский борщевигына каршы көрәшмәгән җир кишәрлекләре хуҗалары административ штрафлар белән очрашырга мөмкин. Административ хокук бозулар турындагы Кодекска тиешле төзәтмәләр инде әзерләнә, дип хәбәр иттеләр ТР Авыл хуҗалыгы һәм азык-төлек министрлыгы матбугат хезмәтендә.

Тәртип бозучыларга нинди штрафлар яный?

Физик затларга — 2 меңнән 5 меңгә кадәр;

Вазыйфаи затларга — 20 меңнән 50 меңгә;

Юридик затларга — 150 меңнән 1 миллионга кадәр.

Борщевикны кем күзәтеп торырга тиеш?

Торак пунктларда контроль җирле үзидарә органнарына йөкләнгән;
Авыл хуҗалыгы җирләрендә милекчеләр, арендаторлар һәм җирдән файдаланучылар җаваплы.

2026 елдан яңа Федераль закон

2026 елның 1 мартыннан Россиядә җир кишәрлекләренең барлык хуҗаларын һәм кулланучыларын куркыныч инвазив үсемлекләрне, шул исәптән Сосновский борщевигын юк итәргә мәҗбүр итүче закон үз көченә керәчәк. Югыйсә аларны штрафлар көтә.

Ни өчен бу мөһим?

Сосновский борщевигы — агрессив чүп үләне, ул тиз тарала, җирле үсемлекләрне кысрыклап чыгара һәм кешеләрдә җитди пешүләр китереп чыгарырга мөмкин. Аның контрольсез үсүе экологиягә һәм авыл хуҗалыгына куркыныч тудыра.