Алабугалыларның Рөстәм Нуриев белән очрашу нәтиҗәләре

Очрашуда шулай ук шәһәрнең төрле структуралары вәкилләре катнашты. Рөстәм Нуриев соңгы еллардагы эш нәтиҗәләре турында сөйләде һәм киләчәккә планнары белән уртаклашты. Район башлыгы махсус хәрби операция зонасында булган егетләргә гуманитар ярдәм күрсәтү темасына аерым игътибар бирде.

Алабугалылар, үз чиратында, Рөстәм Нуриевка яңа пляж һәм Алабуганың тарихи өлешен үзгәртә баруы өчен рәхмәт белдерделәр һәм берничә мөһим сорау бирделәр.

Алар арасында — массакүләм күңел ачу кварталындагы парковкалар турында. Рөстәм Нуриев хәбәр иткәнчә, шәһәр халкы өчен дә, кунаклар өчен дә парковка урыннары мәсьәләсе карала. Вәзгыять яңа парковкалар урнаштыру нәтиҗәсендә җайга салыначак. Шулай ук башлык Казан урамын Гассар урамыннан алып Стахеевларга кадәрге участокта җәяүлеләр урамына әйләндерү планнары турында хәбәр итте.

Алабугалыларны тагын бер борчыган сорау — мәктәпләр «Университет» мәктәбе үрнәгендә биш көнлек атнага күчәрме.

Очрашуда катнашкан АМР башкарма комитеты җитәкчесенең социаль сәясәт буенча урынбасары Елена Мерзон, агымдагы уку планында бу бик катлаулы, балалар 8-9 дәрес алыр иде, дип билгеләп үтте.

— Без бу мәсьәләне өйрәндек, — диде Рөстәм Нуриев. — Биш көнлек вакыт эчендә балалар караңгы төшкәч китәчәк һәм караңгы төшкәч өйләренә кайтачак. Уку процессы федераль законнар белән расланган, без аны үзгәртергә хокуклы түгел.