Алабугалыны ашамлыклар урлаган өчен хөкем иткәннәр

Алабуга шәһәр прокуроры ярдәмчесе Семен Гришин сөйләгәнчә, судта шунысы ачыкланган: әлеге гаепләнүче быел 7 февральдә сәүдә залыннан яшерен рәвештә 1 мең 692 сумлык ашамлыклар алып чыккан.

Аны сатучы-кассир күреп алган һәм, ул чыгып барган вакытта, берничә тапкыр аның туктавын сораган. Ир-ат таләпкә буйсынмыйча качып китәргә маташкан. Кибет янында торучы гражданнар аны тоткарлаган. 
Хөкем ителүче үз гаебен тулысынча таныган, гамәле өчен үкенүен белдергән. 

Суд хөкем ителүчене гаепле дип таныган һәм 8 айга сынау вакыты белән, махсус дәүләт органы рөхсәтеннән башка яшәү урынын үзгәртмәү, әледән-әле шушы органга теркәлүгә йөрү бурычы йөкләнеп, шартлы рәвештә 1 елга ирегеннән мәхрүм итү рәвешендә җәза билгеләгән. Хөкем карары үз көченә кергәннән соң, гаепләнүче ике ай дәвамында нарколог тикшерүен үтәргә тиеш.

Суд карары закон көченә кергән.