Алабуганың Александр бакчасында «Күзәтү тәгәрмәче» аттракционы барлыкка киләчәк

Район башлыгы Рөстәм Нуриев журналистлар һәм блогерлар белән очрашты. Ул район өчен иң мөһим темаларны яктыртып, сорауларга җавап бирде һәм 2026 елга төп бурычлар турында сөйләде.

Киләсе елда төп фокус кадрлар потенциалын үстерүгә юнәлдереләчәк. Туризм, кунакханә бизнесы һәм җәмәгать туклануы өлкәсендә эшне көчәйтү өчен «Сәүдәгәрләр бистәсе» проект офисы булдырылды, аны Эльмира Туканова җитәкли. Мәгариф һәм инфраструктура өлкәсендә берничә мөһим проект планлаштырылган: мәктәпләрне ремонтлау, реконструкциядән соң Мәдәният сараен ачу һәм аның каршындагы мәйданны төзекләндерү.

«Александр бакчасы» паркында «Күзәтү тәгәрмәче» аттракционы урнаштыру планлаштырыла. Казан урамын төзекләндерү эшләре башланачак, аның бер өлеше җәяүлеләр урамы булачак. Коммуналь инфраструктураны модернизацияләүгә аерым игътибар биреләчәк. Коммуникацияләрне алыштыру буенча эш күләме 600 миллион сумга якын инвестицияләр белән югары дәрәҗәдә калачак.

Төзекләндерү кысаларында Төзүчеләр урамын комплекслы үзгәртеп кору башланачак. Тугаров урамында яңа заманча балалар бакчасы төзү планлаштырыла, ул гамәлдәге өч учреждениене берләштерәчәк. Дөм-Дөм авылының элеккеге мәктәп базасында балалар лагере булдыру мәсьәләсе карала.

Моннан тыш, планнарда — яңа ЗАГС һәм Спорт манежы төзү. Яңа манеж волейбол һәм футбол өчен мәйданчыклар урнаштырырга мөмкинлек бирәчәк, ә бушаган урында ике өстәмә теннис корты барлыкка киләчәк. Шишкин буаларын төзекләндерү дәвам итәчәк. Бу эшләргә «Алабуга» махсус икътисади зонасы 250 млн сум бүлеп бирә.