Белоруссия һәм Татарстанның товар әйләнеше 1,5-2 млрд долларга кадәр үсәргә мөмкин

Ел саен Белоруссия-Татарстан товар әйләнеше 1,5–2 млрд долларга кадәр артырга мөмкин. Бу хакта Беларусь Республикасы Премьер-министры урынбасары Виктор Каранкевич БР һәм ТР хезмәттәшлеге буенча эшлекле төркемнең 12 нче утырышында белдерде, дип хәбәр итә Татарстан Сәнәгать һәм сәүдә министрлыгы матбугат хезмәте.

«Эшчәнлекнең төрле юнәлешләре буенча проектлар үсешендә кызыксыну һәм динамика саклануын билгеләп үтәсем килә <...>. Товар әйләнешенә елына 1,5–2 млрд доллар чыгарга көчебез җитәр дип ышанам. 2023 елда Беларусь президенты Александр Лукашенко һәм Татарстан башлыгы Рөстәм Миңнеханов очрашуында нәкъ менә шундый бурычлар куелды», — дип билгеләде Виктор Каранкевич.

Үз чиратында төркемнең Россия өлеше рәисе, Татарстан Республикасы вице — премьеры-Татарстан Республикасы сәнәгать һәм сәүдә министры Олег Коробченко, «яклар гади сәүдәдән алып тирән фәнни-техник кооперациягә кадәр юл үттеләр», дип белдерде.

Хәзерге вакытта Татарстан һәм Белоруссия сәнәгатьнең, авыл хуҗалыгының һәм башка өлкәләрнең төрле тармакларында хезмәттәшлек итә. Яклар үзләрен бәйли торган икътисадый мөнәсәбәтләрне үстерергә ниятли.

Очрашуда Белоруссия һәм Татарстанның эре компанияләре катнашты. Чара «Халыкара кооперация һәм экспорт» илкүләм проектының максатларына һәм бурычларына туры килә, дип өстәделәр ТР сәнәгать һәм сәүдә министрлыгында, дип яза «Татар-информ».

Фото: ТР сәнәгать һәм сәүдә министрлыгы матбугат хезмәте