Бу атнада биш алабугалы үз проблемалары белән район башлыгына мөрәҗәгать итте

Мәсәлән, Эльвина Ягафарова 29 нчы балалар бакчасындагы веранданың начар булуына, шулай ук учреждение түбәсеннән су үтүгә зарланды. Кабул итүдә аңлатылганча, түбә ремонтына акча бүлеп бирелгән һәм эшләр быел башкарылачак, әмма веранданы төзекләндерү чыгымнары быелгы бюджетка кертелмәгәнлектән, ул киләсе елда ремонтланачак. Моннан тыш, шәһәр казнасындагы 100 миллион сум күп профильле 10 нчы лицейны ремонтлауга тотыла.

Алабугалы Анна Поспелова зират чүплекләренең тулы булуы турында сөйләде. Хатын-кыз бу хәлгә борчылуын белдерде һәм битараф булмаган алабугалылар, ритуаль хезмәтләр вәкилләре, волонтерлар катнашында өмә оештырырга тәкъдим итте. Рөстәм Нуриев Анна Сергеевнаның тәкъдимен кабул итте, ә хәзерге вакытта җыелган чүп-чарны бу һәм киләсе атна дәвамында тиешле хезмәтләргә чыгарырга кушты. Сүз уңаеннан, алабугалыларга таныш булган экоактивист Виталий Филиппов та шәһәрнең чисталыгы өчен борчыла. Ул Рөстәм Нуриевтан үзенә автомобиль бирүне сорады. Экоактивистның үзенең «Волга»сы һәм арба таккан велосипеды бар инде, әмма бу транспорт тирә-яктан җыелган чүп-чар күләме өчен бик кечкенә. Ә чүп җитәрлек, дип билгеләп үтте Виталий Филиппов һәм үз сүзләрен раслау өчен башлыкка фотолар күрсәтте. Рөстәм Нуриев алабугалының табигатьне саклау теләген билгеләп үтте һәм аз тоннажлы автомобиль сатып алырга күрсәтмә бирде.