Дәүләт Думасы депутаты 1 майдан түләүләре арттырылган пенсионерлар категориясен атады

1 майдан кайбер категория пенсионерлар өчен түләүләр арттырылды. Бу хакта Дәүләт Думасы депутаты, кече һәм урта эшкуарлык комитеты әгъзасы Алексей Говырин сүзләренә сылтама белән RT хәбәр итә.

Аның сүзләренчә, бу — яңа чара түгел, ә канунда беркетелгән норма. Ул 80 яшькә җиткән гражданнарга, шулай ук I төркем инвалидларга кагыла. Бу категорияләр өчен иминият пенсиясенең фиксацияләнгән өлеше ике тапкыр арта.

Моннан тыш, балачактан I төркем инвалид булмаган очракта, кеше тәрбиясендәге пенсионерлар өчен ай саен 1200 сум күләмендә өстәмә түләү каралган.

Җиңүнең 80 еллыгы уңаеннан дәүләт шулай ук ветераннарга һәм сугыш елларында зыян күрүчеләргә бер мәртәбә бирелә торган пособиеләр түләячәк. Шул рәвешле, Бөек Ватан сугышында катнашучыларның тол хатыннары һәм инвалидлар — 80 мең, ә балигъ булган элеккеге концлагерь тоткыннары 55 мең сум алачак.

Өстәмә түләүләр алар тәрбиясендә эшкә сәләтсез гаилә әгъзалары булган пенсионерлар өчен дә каралган — бу очракта аларга база суммасының өчтән бер өлеше күләмендә өстәмә түләнәчәк, дип аңлатты Говырин.

Быел Россиядә Бөек Ватан сугышында Җиңүнең 80 еллыгы билгеләп үтелә. Шулай ук РФ Президенты Владимир Путин карары белән 2025 ел Ватанны саклаучылар елы дип игълан ителде. Күптән түгел ТР Рәисе Рөстәм Миңнеханов сугыш ветераннарына бүләкләр тапшырды. Ул Россиянең бүгенге казанышларында аларның һәркайсының зур өлеше булуын билгеләп үтте.