Диетолог цитруслыларның кешенең кәефенә йогынтысы турында сөйләде

Галимнәр ачыклаганча, көненә бер әфлисун гына да психик тайпылыш куркынычын 20 процентка киметә. Әмма диетолог һәм нутрициолог Роман Пристанский «Радио 1» белән әңгәмәсендә моның шикле белдерү булуын әйтте, дип яза «Татар-информ».

«Шуның нигезендә, цитруслыларга аллергия кичерүче кешеләр даими рәвештә депрессив һәм психиатрик халәттә булырга тиеш. Бу иртән бер кружка су эчкән кебек һәм озаграк яшәвең ихтимал», — дип аңлатма бирде белгеч.

Аның сүзләренчә, бу тикшеренүдә рациональ әйбер бар: эчәклек микробиотасы, чыннан да, билгеле бер гормоннар эшләп чыгаруга йогынты ясый.

«Серотонин бүленеп чыгу буенча ике төп процесс бар: ризык кабул итү һәм билгеле бер бактерияләр эшләп чыгару. Ягъни тупас итеп әйткәндә, ризык керә, ашказаны-эчәклек тракты буенча үтә, механик ярсу барлыкка килә, серотонин ясала, эчәклек перистальтикасы көчәя, ашказаны эчендә лайла бүленеп чыга башлый, моңа күпсанлы төрле функцияләр кушыла», — дип аңлатты диетолог.