Эссе җәй Татарстан кырларына корткычлар һөҗүмен көчәйтәчәк

Татарстанда алдагы җәйнең эссе булуы көтелә, мондый һава торышы басуларда корткычлар таралуга китерәчәк. Бу хакта «Агросәнәгать комплексы продукциясенең иминлеген һәм сыйфатын бәяләү федераль үзәге» федераль дәүләт бюджет учреждениесенең Татарстан Республикасындагы филиалы директоры урынбасары Идрис Гатин сөйләде, дип яза «Татар-информ».

«Барлык зыян китерә торган корткычлар — кисмән, коңгыз, бет, борча — бик яхшы үсә, үрчи. Әгәр көчле химик препаратлар, химик саклану чаралары кулланмасак, аграрийлар моннан котыла алмаячак», — дип сөйләде ул.

Салкынча һава торышы һәм яңгырлар, киресенчә, гомуми фитосанитар вазгыятькә уңай тәэсир итә, дип өстәде Гатин.

«Һәр культураның үз корткычлары һәм үз саклану чаралары бар. Үсемлекләрнең шытучанлыгы һәм булачак уңыш сайланган сортларга, барлык агрономик һәм агротехник чараларны һәм технологияләрне үтәүгә бәйле», — дип ассызыклады ул.