Гаилә, мәхәббәт һәм тугрылык көнендә Алабуга гаиләсе яңа автобус алды

Татарстанда Гаилә, мәхәббәт һәм тугрылык көнен бәйрәм итү кысаларында күп балалы алты гаиләгә яңа автобус ачкычлары тапшырылды. Тантана Г.Камал исемендәге театр мәйданчыгында «Гаилә тарихында гасырлар кайтавазы — Тарихта без эзлебез» шәҗәрә фестивале кысаларында узды, дип хәбәр итә ТР Дәүләт Советы матбугат хезмәте.

Транспорт чараларын алучылар арасында Алабуга районыннан ун бала тәрбияләүче Гильдебрант гаиләсе дә бар. Гаилә башлыгы Максим Робертович — үзмәшгуль, ә аның хатыны Ольга Сергеевна — хуҗабикә. 

Ун һәм аннан да күбрәк бала тәрбияләүче барлык катнашучы гаиләләр «Атлант» маркалы 16 урынлы автобуслар алды. Бүләкләү тантанасын Татарстан Республикасы Дәүләт Советы Рәисе Фәрит Мөхәммәтшин уздырды. Күп балалы гаиләләргә мондый ярдәм чарасы ТР Рәисе Рөстәм Нургали улы Миңнеханов тарафыннан тәкъдим ителгән иде.

Җитәкче әйтүенчә, күп балалы ата-аналар яшь гаиләләр өчен үрнәк булып тора, ә аларның үзара ярдәмләшү һәм хөрмәт атмосферасында тәрбияләнгән балалары киләчәктә ата-аналар һәм республиканың актив гражданнары өчен терәк булачак.

Мөхәммәтшин шулай ук билгеләп үткәнчә, Татарстанда яшьләр үсеше өчен барлык шартлар да тудырылган, ә гаиләләргә, бигрәк тә күп балалыларга ярдәм итү дәүләт сәясәтенең мөһим юнәлеше булып кала. Чара ахырында барлык катнашучыларга сәламәтлек, бәхет һәм иминлек теләделәр.