Яшел Үзәндә күпкатлы йортта чыккан янгында өч кеше һәлак булган

Яшел Үзәндә төнге сәгать өчләр тирәсендә Чапаев урамы, 1 адресы буенча коридор тибындагы тугыз катлы кирпеч йортта янгын чыккан. Бу хакта «Татар-информ» га Россия гадәттән тыш хәлләр министрлыгының ТР буенча баш идарәсендә сөйләделәр.

Янгын сүндерүдә һәм эвакуацияләүдә МЧСның 27 белгече һәм 7 берәмлек техника катнаша. Аларның гамәлләре нәтиҗәсендә 9 кешене коткарып кала алганнар, алар арасында ике бала да бар.

Кызганычка, янгын нәтиҗәсендә ике ир-ат һәм бер хатын-кыз һәлак булган. Аларның шәхесләре хәзер ачыклана.

Янгын мәйданы 10 кв. м тәшкил иткән. Дәүләт янгын күзәтчелеге тикшерүчеләре килеп чыккан хәлнең сәбәбен ачыклый.

Хәлләрне ачыклау өчен вакыйга урынына шәһәр прокуроры Дмитрий Ерпелев килгән. Фаҗиганең башлангыч сәбәбе — ут белән саксыз эш итү.

Фото: Россия гадәттән тыш хәлләр министрлыгының ТР буенча Баш идарәсе