Иртәгә Татарстанда 14 градус җылы көтелә

Җомга, 8 апрельдә, төнлә һәм иртән Татарстанда томан көтелә. Республика юлларында көчле бозлавык булачак. Татарстанның Гидрометеорология һәм әйләнә-тирә мохитне күзәтү идарәсе шул турыда кисәтә, дип яза Татар-информ.

Киләсе тәүлектә, ягъни җомга көнне аязучан болытлы һава булуы фаразлана. Көндез явым-төшемнәр көтелми, төнлә һәм иртән юеш кар һәм яңгыр явачак. Җил көньяктан һәм көньяк-көнбатыштан булыр дип көтелә.

Синоптиклар төнлә һава температурысының −3°... +2°, көндез +9°... +14° җылы булачагы турында җиткерде.