Юрист: Бу җәмгыять белән хезмәттәшлекнең яңа дәрәҗәсе

Россия Конституциясенә гражданнар җәмгыяте институтларының сәясәтне формалаштыруда катнашуы турындагы төзәтмә – җәмгыять һәм дәүләт арасындагы хезмәттәшлектә яңа сыйфатлы адым. “Россия юристлары Ассоциациясе” Гомумроссия иҗтимагый оешмасының Татарстан төбәк бүлеге башкарма комитеты рәисе Тимур Какохо әнә шулай дип саный. Бу хакта “Татар-информ” мәгълүмат агентлыгы хәбәр итә.

“Минем фикеремчә, коммерциячел булмаган оешмалар белән хезмәттәшлекнең сыйфатлырак дәрәҗәсенә күчәргә кирәк. Кешеләрне теге яки бу мәнфәгатьләр һәм социаль проблемалар буенча берләштерүче коммерцияле булмаган оешмалар гамәлдәге законнарга үзгәрешләрен тәкъдим итә алсыннар иде”, – дип билгеләп үтте җәмәгатьче.

Күп кенә демократик илләрдә көчле профсоюзлар һәм коммерцияле булмаган оешмалар бар, алар үзгәрешләр таләп итә һәм үз идеяләрен тәкъдим итә ала, дип өстәде ул. Хәзер Россиядә тиешле мөмкинлек закон дәрәҗәсендә беркетеләчәк.