Сәламәтлек саклау-2024: диспансеризация, дәвалау, капиталь ремонт

Демографик вәзгыять

Узып баручы елда Алабуга районында, кызганычка, үлүчеләр саны арту һәм туучылар саны кимү аркасында демографик вәзгыять начарланды, дип хәбәр итә медицина хезмәткәрләре.

Туучылар саны мең кешегә 7,8 процент тәшкил иткән, бу 2023 елның 11 ае (8,3) күрсәткеченнән 6 процентка кимрәк. 612 бала туган, бу узган ел белән чагыштырганда 38гә кимрәк.

Халыкның гомуми үлү күрсәткече быел узган елдагыдан югарырак, ул мең кешегә 11,7 очракны тәшкил итә. Үлемнең төп сәбәпләре булып кан әйләнеше системасы авырулары — 38 процент, яман шешләр — 13, җәрәхәтләр һәм агуланулар — 12 кала. Шунысын да билгеләп үтәргә кирәк, Алабуга районында үлүчеләр саны — уртача республика күрсәткече дәрәҗәсендә.

Нәтиҗәдә халыкның табигый кимүе теркәлгән. Сүз уңаеннан, АМР буенча табигый үсешнең иң югары күрсәткече 2012 елда теркәлгән — плюс 5,2 промилле.

Территориядә халык саны 85471 кеше тәшкил итә.

Диспансеризация һәм медицина тикшерүе

Быел 25833 кешегә профилактик тикшерү үткәрелгән. Декабрь уртасына өлкән яшьтәге халыкны диспансерлаштыру буенча еллык план 97,5 процентка, профилактик тикшерүләр буенча — 103 процентка үтәлгән.
Covid-19 белән авырган 4574 кеше тирәнтен диспансерлаштыру узган. Беренче мәртәбә яман шешнең 24 очрагы ачыкланган, шулардан 70 проценты — башлангыч стадиядә; шикәр чире белән авыручыларның 8 очрагы; кан әйләнеше системасы авыруларының 112 очрагы.

Быел медицина белгечләре сәнәгать предприятиеләре хезмәткәрләренә дә диспансеризация оештырдылар. Аны мобиль бригадалар ярдәмендә тормышка ашырдылар. Хәзер дә профилактика бүлеге шәһәр һәм район предприятиеләре хезмәтчәннәренең сәламәтлек торышын тикшерү эшен дәвам итә. Бүгенгә 21421 кеше мондый тикшеренү узган.

Өлкәннәр сәламәтлеге

Халыкны социаль яклау бүлеге белән берлектә гамәлгә ашырыла торган «Демография» илкүләм проектының «Өлкән буын» төбәк проекты программасы кысаларында авыл җирендә яшәүче 65 яшьтән өлкәнрәк кешеләргә медицина тикшерүе уздырылды. Бер ел эчендә 917 кеше тикшерелгән.

Йөкле хатын-кызлар һәм артериаль гипертензия

Әлеге елның мартыннан Алабуга медицина хезмәткәрләре артериаль гипертензияле авырлы хатыннарны дистанцион мониторинглау буенча пилот проектын гамәлгә ашыра башлады. Анда 75 пациент катнашкан. Булачак әниләрне күзәтү махсус җайланмалар ярдәмендә һәм роботлаштырылган шалтырату ярдәмендә башкарылган. Әлеге проектны табиб-терапевт һәм ике акушер-гинеколог җитәкләде.

Мондый мониторинг җитди йөрәк-кан тамырлары тайпылышлары санының кимүенә китергән. Ә бу, нәтиҗәдә, ашыгыч медицина ярдәме чакыруларын һәм ашыгыч госпитализацияләр санын киметүгә китерә. Катлауланулар барлыкка килү куркынычы кими.

Стационарда дәвалану

Тәүлек буе эшли торган стационарда 11 ай эчендә 12 561 кеше дәваланган. Биредә ятуның уртача озынлыгы 6,5 көнне тәшкил иткән. 2437 операция ясалган.

Капиталь ремонт

Бу ел дәвамында Алабуга үзәк район хастаханәсе биналарына капиталь ремонт ясалды. Башкарылучы эшләрнең заказчысы — «ТР Баш инвестицион-төзелеш идарәсе».

Инфекция бүлеге бинасын ремонтлау дәвам итте. Эшләр узган елның февралендә башланган иде. 2023 елда Татарстан Республикасы Министрлар Кабинеты карары буенча «Стационар медицина ярдәме» программасы буенча республика бюджеты акчаларыннан капиталь ремонтка 46202370 сум акча бүлеп бирелгән. Быел өстәмә финанслау — 16550000 сум бүлеп бирелгән;
Бер ел элек терапия корпусы бинасына капиталь ремонт башланып киткән иде. Аны үткәрү өчен быел республика бюджетыннан 289230444 сум акча керде.

Быел июль аенда стационар бинасын капиталь ремонтлау эшләре башланды, аларга республика бюджетыннан 246769555 сум җибәрелде.