Шамил Садыйков әйтүенчә, җәмгыятьтә басма китаплар һәм журналлар уку тренды яңадан кайта

2021 елның икенче яртыеллыгына язылу кампаниясе нәтиҗәләре буенча, «Татмедиа» басмаларының гомуми тиражы 19,6 процентка арткан. Укучылар арасында республика һәм җирле газета һәм журналлар зур популярлык казана. Бу хакта «Татар-информ» журналистлары белән әңгәмәдә «Татмедиа» АҖ генераль директоры Шамил Садыйков хәбәр итте.
Пандемия холдингның матбугат басмалары популярлыгы үсешенә комачаулый алмаган. «Кешеләр укуын дәвам итә һәм басма продукция белән актив кызыксына. Бу интернет һәм социаль челтәрләрне үстерү белән бер үк вакытта бара. Бүгенге көндә «Татмедиа» интернет-киңлектә күп кенә проектлар булдыра, шул ук вакытта традицион басма матбугатка һәм журналларга карата укучыларыбызның кызыксынуы югары дәрәҗәдә кала», — ди Шамил Садыйков.
Ул шулай ук «Татмедиа» басмаларына язылу һәм тиражлар буенча яңа статистиканы атады. Газета һәм журнал тиражлары 20 процентка арткан. 
«Яртыеллыкка язылу кампаниясе нәтиҗәләре буенча «Татмедиа» басмаларына гомуми язылу тиражы 227,6 мең данә тәшкил итте, ә 2020 елның икенче яртыеллыгында ул 190,4 мең данә булган иде. Район һәм шәһәр газеталарына язылу күләме 120,8 мең данә тәшкил итә, республика газеталарына — 33,1 мең данә (2020 елның шушы чорына карата үсеш 11,6 процент). Журналларга язылу 73 мең данәдән артып китте (узган елгы күрсәткечләргә карата 217 процент)», — диде Шамил Садыйков.
Бу уңышлар Татарстан Республикасы Президенты, республика Дәүләт Советы һәм аның Татар телен үстерү буенча комиссиясе тарафыннан даими ярдәме белән мөмкин булган. Алар ярдәме белән Татарстанның барлык социаль-мәдәни объектлары мәйданчыкларында журналлар бар, язылу өчен мөмкинлек булдырылган. Шуның нәтиҗәсендә бүгенге көндә «Татмедиа» төбәкне үз басмалары белән тулысынча диярлек колачлауга ирешкән. Республиканың һәр кешесе рус, татар, чуваш һәм удмурт телләрендә матбугат басмаларыннан файдалана ала.