Татарстанда бу җәйдә 11,5 меңнән артык яшүсмер вакытлыча эшкә урнашкан

Татарстан Республикасы халыкны эш белән тәэмин итү үзәге 14 яшьтән 18 яшькә кадәрге яшүсмерләрне җәйге каникул һәм укудан буш вакытта вакытлыча эшкә урнаштыру эшен дәвам итә. ТР Хезмәт министрлыгында хәбәр итүләренчә, 31 августка 11 567 яшүсмер эш алган.

Егетләр һәм кызлар махсус күнекмәләр яки һөнәри белем таләп итми торган вазифаларга урнаша: алар ярдәмче эшчеләр, хезмәт биналарын җыештыручылар, урам себерүчеләр булып эшлиләр, шулай ук патриотик юнәлештәге шәһәр чараларын оештыруда ярдәм итәләр, авыл хуҗалыгы эшләре белән шөгыльләнәләр һәм мәктәп яны участокларында эшлиләр.

РФ Хезмәт кодексы нигезендә эш бирүчеләр яшүсмерләргә хезмәт хакын минималь хезмәт хакыннан да ким булмаган дәрәҗәдә түли. Мәшгульлек үзәге аша эшкә урнашкан балигъ булмаганнарга өстәмә рәвештә финанс ярдәме күрсәтелә — эшләгән һәр ай өчен 2 650 сум.

Яшүсмерләрне эшкә урнаштыру «кадрлар» милли проекты тарафыннан хупланган «ТР халкын эш белән тәэмин итүгә ярдәм» дәүләт программасы кысаларында гамәлгә ашырыла.