Татарстанда ел башыннан илкүләм проектларны башкаруга 1,5 млрд сум бүлеп бирелгән

2026 елның гыйнварында Татарстанда илкүләм проектларны башкаруга 1 млрд 543,6 млн сум бүлеп бирелгән. Касса үтәлеше 1 млрд 398,6 млн сум тәшкил иткән, дип хәбәр итә ТР Финанс министрлыгының матбугат хезмәте.

Быел илкүләм проектларны тормышка ашыруга Татарстан бюджетында барлыгы 53,0 млрд сум акча каралган. Шуның 28,8 млрд сумы федераль бюджет хисабына, ә 24,2 млрд сумы республика бюджеты хисабына биреләчәк.

Татарстан 2026 елда 12 илкүләм проектны гамәлгә ашыруда катнаша. Бу «Гаилә», «Яшьләр һәм балалар», «Кадрлар», «Озак һәм актив тормыш», «Туризм һәм кунакчыллык», «Тормыш өчен инфраструктура», «Пилотсыз авиация системалары», «Экологик иминлек», «Азык-төлек иминлеген технологик тәэмин итү», «Нәтиҗәле һәм конкурентлы икътисад», «Мәгълүматлар икътисады һәм цифрлы трансформация» һәм «Халыкара кооперация һәм экспорт».

Чыганак: Татар-информ.