Татарстанда опекуннарга һәм попечительләргә түләүләрне арттыру планлаштырыла

Татарстан Юстиция министрлыгында Хокук мәсьәләләре буенча ведомствоара координация комитетының Эксперт советы утырышы узды. «Татарстан Республикасы Гаилә кодексының 141.1 маддәсенә үзгәрешләр кертү турында» закон проекты фикер алышуда төп мәсьәләләрнең берсе булды, ул опекуннарга һәм попечительләргә айлык түләүне арттыруны күздә тота. Бу хакта республиканың Юстиция министрлыгы матбугат хезмәте хәбәр итә.

Документны әзерләүчеләр сүзләренчә, түләүләрне арттыру гаиләләрнең социаль яктан якланганлыгын арттырачак, әти-әни тәрбиясеннән мәхрүм калган балалар өчен уңайлы шартлар булдырачак, шулай ук республикада опека институты абруен арттырачак.

«2013 елдан бирле опекуннарга һәм попечительләргә түләүләр киредән каралмаган, гәрчә ул вакыттан икътисади чынбарлык сизелерлек үзгәрде. Без үзләренә шундый мөһим һәм җаваплы бурыч алучыларга булышырга омтылабыз», — диделәр утырышта.

Закон проекты айлык түләүне 3 000 сумнан 8 641 сумга арттыруны күздә тота. Бу яңа опекуннар җәлеп итәргә һәм тәрбиягә алган гаиләләрдәге балаларга лаеклы шартлар булдырырга мөмкинлек бирәчәк, дип көтелә.

2025 елның июленә Татарстанда тәрбиягә алган гаиләләрдә 1 788 бала исәпләнә. 2026 елда балалар саны 1600 булыр дип фаразлана.

Законны тормышка ашыру өчен 2026 елда республика бюджетының өстәмә чыгымнары якынча 189 млн сум булыр дип көтелә. Закон проекты карау өчен республиканың Дәүләт Советына кертелгән инде.