Татарстанлылар КФҮ аша Бөтенроссия халык санын алуда катнаша алачак

Татарстан Республикасында КФҮ директоры Ленара Мозаффарова ведомство киңәшмәсендә билгеләп үткәнчә, Татарстан халкы күпфункцияле үзәкләр аша Бөтенроссия халык санын алуда катнаша ала. Бу хакта «Татар-информ» мәгълүмат агентлыгы яза.
«Берничә айдан соң КФҮгә Бөтенроссия халык санын алуда катнашу өчен килергә мөмкин булачак. Күпфункцияле үзәкләрдә стационар постлар эшләячәк», — дип сөйләде докладчы.
Ленара Мозаффарова билгеләп үткәнчә, гражданнарга шулай ук РФ Дәүләт хезмәтләре порталында электрон битне мөстәкыйль рәвештә тутыру мөмкинлеге биреләчәк.
«Халык санын алу кампаниясе башлануга тулырак мәгълүмат биреләчәк», — дип аңлатты ул.