Татарстанлыларга җәмәгать транспортында QR-кодларны тикшерү тәртибе турында сөйләячәкләр

Җәмәгать транспортына медотводы булганнарны кертерләрме, пассажирларда QR-кодларны кем һәм ничек тикшерәчәк — республика халкының бу һәм башка сорауларына туры эфирда җавап бирәчәкләр. Трансляция 19 ноябрьдә 13.00 сәгатьтә башлана.

Турыдан туры эфирда ТР Транспорт һәм юл хуҗалыгы министры Фәрит Хәнифов һәм Роспотребнадзорның ТР буенча идарәсе җитәкчесе урынбасары Марина Трофимова катнаша.

Әңгәмәнең модераторы — ТР сәламәтлек саклау министры урынбасары, Казанның Сәламәтлек саклау идарәсе башлыгы Владимир Жаворонков.
Эфир ТР Оператив штабы, ТР Транспорт һәм юл хуҗалыгы министрлыгы һәм ТР Роспотребнадзор аккаунтларында узачак.